Boncompagnus 1.10 
Table of Contents -- Previous title -- Next title-- Tituli 
Incipits -- Siglorum conspectus

|1.10 DE PROSPERIS EVENTIBUS, QUI SCOLARIBUS IN PRIMORDIO STUDII OCURRUNT

|1.10.1 De scolari, qui significat, quod in eundo ad studium sibi cuncta prospere successerunt.

[1] "Benedictus Dominus Deus, qui michi sicut filio Tobie misit angelum suum ad dirigendum gressus meos in viam pacis, unde Parisius cum optata prosperitate deveni et ibidem sine aliquo incommodorum eventu incepi studere."

1.10.2 Responsiva cum expressione gaudii.

[1] "Exordium optate salutis et narrationem gaudii peroptati michi obtulit tuarum pagina litterarum, quia per earum significata plenius intellexi, quod de tuo statu et continentia desiderabam audire."

1.10.3 Missiva de simili materia.

[1] "Letetur cor vestrum et inenarrabili iocunditate letetur, quia Deus pater iter meum dignatus est in omnibus et per omnia prosperari, addens ita prosperitati favorem, quod nichil in scolis michi deesse videtur ad plenitudinem gaudiorum."

1.10.4 Responsiva cum expressione gaudii.

[1] "Tuarum pagina litterarum nos fecit plurimum congaudere, quia per eam nobis innotuit, quod in eundo Bononiam omnia tibi prospere successerunt et ibidem in scolis prosperaris, unde nobis letitia ineffabilis geminatur."

1.10.5 Missiva de consimili materia.

[1] "A vobis licentia impetrata et recepto benedictionis vestre munere cepi ad studium properare, sicque cum successivo fortune incremento intravi Bononiam, ubi a socis et amicis fui cum ingenti alacritate receptus et ab eis multipliciter honoratus. Postmodum vero conduxi hospitium, preelegi michi magistrum et socios competentes cum quibus lego et proficio iugiter in moribus et doctrina. Hec ideo vobis intimare curavi, ut nulla de meo statu in vestris vel carorum nostrorum animis dubitatio generetur. Consuevit enim plurimis de filiis, qui morantur in provinciis alienis, intextimabilis dubietas provenire. Insuper me ad has litteras destinandum lacrime, quas in procinctu itineris mei fudistis plurimum invitarunt."

1.10.6 Notula doctrinalis.

[1] Nota, quod de huiusmodi gaudiorum expressione in multis poteris titulis invenire copiosas materias respondendi.

***
© Steven M. Wight, Los Angeles 1998
Scrineum © Università di Pavia 1999