Boncompagnus 1.15 
Table of Contents -- Previous title -- Next title-- Tituli 
Incipits -- Siglorum conspectus

|1.15 DE HONORE AC VITUPERIO CONVENTORUM

1.15.1 Intimatur parentibus, quomodo eorum filius debeat in proximo conventari.

[1] "Germen, quod a vestra radice processit in plantulam, sollempnibus exercitiis pertransivit et ita in arborem est conversus, quod ex ea fructus desiderabiles collegitis. Cito enim debebit ad magisterii gloriam promoveri, unde tam vobis quam suis consanguineis et amicis volui tante letitie preconium enarrare."
 | [7va] P

1.15.2 Significatur, cum quanto sit conventatus honore.

[1] "Cantate Domino canticum novum, psallite in cordis et organo, cum cymbalis bene sonantibus iubilate, quia filius vester venerabilissimum celebravit conventum, in quo fuit numerosa magisterorum et scolarium multitudo. Ipse vero querentibus et questionibus absque defectu aliquo satisfecit. Nullus ei concludere potuit opponendo, sed ille universis obiciendo conclusit et nemo fuit, qui suis potuerit argumentis instare. Preterea famosum convivium celebravit, in quo tam pauperes quam divites melius quam unquam auditum fuerit honorati fuerunt. Item cum sollempnitate scolas celebres iam regere incepit, vacuavit scolas cultorum et habet plurimos auditores."

1.15.3 De illo, qui male celebravit conventum, et de alio, qui bene solvit questionem, et de tertio, qui male.

[1] Contrario dici valet: talis celebravit conventiculum non conventum, in quo sedit tamquam hyrcus in cathedra, et 'rabbi' fuit derisorie appellatus, quia non erat puer, qui sibi de quolibet sophismate non cluderet manifeste, et ipse in obiciendo procedere non sciebat. Invitati autem ad convivium taliter comederunt, quod non habuerunt voluntatem bibendi. Item cepit regere cum quibusdam conducticiis et novitiis, quia nullum valet habere profectum, nisi velit illum precio nummario comparare.

[2] Item talis non facit conventum, sed fuit proposita questio, quam philosophice determinavit, unde omnes in admiratione stupebant.

[3] Item e contrario ipsemet fecit proponi cunctis videntibus questionem, credens recte iacere ante oculos pennatorum. Verumtamen ad sui pudoris augmentum eandem penitus solvere ignoravit, unde post eum omnes et singuli| subsannabant.

singuli | [7vb] P
***
© Steven M. Wight, Los Angeles 1998
Scrineum © Università di Pavia 1999