Der Welsche Gast - V

by Thomasin von Zerklaere

ed. HEINRICH RÜCKERT 
(Quedlinburg/Leipzig 1852)

 machine-readable text by Minoru Shigeto (Tokyo, 1997)
conversion from TUESTEP format by Uta Recker (Tübingen, 1999)
corrections and HTML rendering by Steven M. Wight (Los Angeles, 1999)
Prosa Prolog -
Teil 1 - Teil 2 - Teil 3 - Teil 4 - Teil 5:  [5.1] [5.2] [5.3] [5.4][5.5] [5.6] [5.7]
Teil 6 - Teil 7 - Teil 8 - Teil 9 - Teil 10

[5.1]   Mich dunket, ich hab ein lange zît
geseit waz vreude tugent gît
und daz der tugenthafte man   [5695]
nie dehein unsælde gewan.
Ich zeigt daz er sol vürhten niht
swaz im zungelücke geschiht.
Nu wil ich iu zeigen vür baz
wie die tugende vüegent daz,   [5700]
daz man ze Himel komen sol.
Sô hân ich danne gezeiget wol
daz niht sô nütz sô tugent ist,
swer ir volget zaller vrist.
    Ez sint zweier slahte guot   [5705]
und zweier slahte übel, swer sîn tuot
war; daz vümfte bereitschaft ist
und geziuc des übelen zaller vrist.
    Daz êrste heizet oberstez guot,
wan ez niht wan rehte tuot:   [5710]
daz ist unser herre Got.
Sîn wille unde sîn gebot
ist daz man rehte tuo,
swer im wil komen zuo. 
Von reht Got alsô heizen sol,   [5715]
wan ir sult daz glouben wol
daz von dem oberisten guot
kumt swaz man rehtes tuot.
    Daz ander heizet guot gar,
daz sint die tugende, daz ist wâr. [5720]
Gar guot ich si da von heizen wil,
wan von den tugenden koment vil
hin ze dem oberisten guot:
wan swer nâch den tugenden tuot,
wizzet daz er komen sol   [5725]
zem oberisten guote wol.
    Daz êrste übel der Tiuvel ist,
wan von dem kumt zaller vrist
swaz übels in der werlde geschiht;
dâ ist er âne teil niht.   [5730]
Den muge wir heizen wol
daz niderst übel, wan er sol
durch sînen grôzen übermuot
und daz ez daz oberist guot
wil, wesen zaller vrist   [5735]
niderre dan dehein übel ist.
    Daz ander übel, daz ist wâr,
daz ist der untugende schar.
Die heiz ich gar übel von reht,
wan si machent den wec sleht   [5740]
unz dâ daz niderst übel lît:
dar bringent si uns zaller zît.
    Daz vümfte ist übel unde guot,
als mich bewîset mîn muot.
Ich mein diu sehs dinc, adel, maht,   [5745]
gelust, name, rîchtuom, hêrschaft. 
Si sint gerlîch guot niht,
wan ez eim übeln manne geschiht
daz er si hât, daz ist wâr.
Sô sint si ouch niht übel gar,   [5750]
wan si hât dicke ein wol gemuot.
Sô sint si übel unde guot:
mich dunkt, swaz wirrt und hilfet wol,
übel und guot heizen sol.
Daz hân ich an den sehs dingen   [5755]
gezeiget, daz dâvon muoz gelingen
den guoten und den übeln niht,
wan in dâ von leit geschiht.
Sô sint si übel unde guot
dar nâch und ist des mannes muot   [5760]
der mehtic ist unde rîche,
daz geloubet sicherlîche.
Swer sîn rehte war tuot,
der gelust ist selten guot,
wan er in dem lîbe ist   [5765]
und ziuht zundingen zaller vrist.
Ob aver irz welt sô vernemen
daz ir gelust woldet nemen
vür den willn, sô wær er guot
dar nâch und wær des mannes muot.   [5770]
Man solz alsô vernemen niht,
wan der gelust ist enwiht
und bezzert doch dicke einen man,
der wol derwider strîten kan.
    Des nidersten übels bereitschaft   [5775]
sint diu sehs.  Er hât die kraft
daz er dermit ziuhet zaller zît
den übelen dâ er selbe lît. 
Wie allez daz geschehen sol,
daz wil ich sagen, merketz wol.   [5780]
[5.2]   Mir seit mîn sin und ouch mîn muot,
swaz hin zem oberisten guot
reichen sol, daz muoz vür wâr
wesen ûz erwelt gar.
Diu stiege diu dar reichen sol,   [5785]
diu sol gemacht sîn harte wol.
Die steine die man dar in tuot,
die suln sîn gerlîchen guot.
Die stafel suln ganz wesen,
dar zuo sol man guot steine erlesen.   [5790]
Die tugende müezen sîn diu stiege.
Ob iemen dunket daz ich liege,
der sage waz sî gerlîch guot.
Wan ob er danne daz getuot,
sô muoz er sagen wol vür wâr   [5795]
daz die tugende guot sint gar,
wan niht anders zer werlde ist
daz gar sî guot zaller vrist.
Sô mac ouch niht gereichen baz
zem obersten guote, wizzet daz.   [5800]
Daz swære daz muoz ziehen nider
und kumt von sîner kraft niht wider.
Daz übel erreichet niht daz guot
daz anderswâ hât sînen muot.
Daz ringe ziuht hô zaller vrist.   [5805]
Ein guot bî dem andern ist,
sô ist ouch reht daz zaller zît
ein übel bî dem andern lît.
    Nu habet ir vernomen wol
von wiu ein man machen sol   [5810]
die stiege diu zem obersten guot
komen müge.  Swer hât den muot
daz er dar ûf komen wil,
der muoz gedenken harte vil
wier die stiege machen sol,   [5815]
daz er dar ûf stîge wol.
    Ein ieglich staphel muoz sîn
ganz von einer tugent, deist mîn
wille unde ouch mîn rât.
Swenn man dar ûf danne gât,   [5820]
sô mac man varn sicherlîchen:
doch sol man varn stætelîchen.
    Swer die stiege machen wil,
der sol sich des ouch vlîzen vil
daz die untugende komen niht   [5825]
dar zuo: wan ob daz geschiht,
sô nemt daz in iuren muot,
daz si zem oberisten guot
nimmer wol gereichen mac.
Jâ sol diu naht und der tac   [5830]
nimmer in ein ander komen.
Ich enhânz ouch nie vernomen
daz ez tac wær umb mitte naht:
wan diu vinster hiet die maht
daz si schînen möhte wol,   [5835]
daz doch niht wesen sol.
Sam mac diu tugent, daz ist wâr,
mit der untugent schar
niht ensamt wesen wol.
Swer die stiege machen sol   [5840]
diu hin zem oberisten guot
reiche, der habe sô reinen muot 
daz ez sî unschúne niht,
swaz man in der stiege siht.
Swaz man in die stiege tuot,   [5845]
sol gar sîn lûter unde guot.
    Nu habt ir vernomen wol
welich stiege varn sol
hin zem oberisten guot.
Nu gert ze sagen mîn muot   [5850]
welch stiege var zaller vrist
dâ daz niderst übel ist.
Ez muoz ein stiege varen dar
diu von übelen dingen gar
geworht sî, diu vert dâ hin.   [5855]
Swers machet, der hât búsen gwin.
Sîn lôn wirt nôt unde leit,
daz er enphæht vür sîn arbeit.
Swaz man mit untugenden tuot,
daz mac nimmer werden guot.   [5860]
Sô geloubet wol vür wâr
daz untugent ist übel gar.
Anders ist niht gar unguot
in deheines mannes muot
ân untugent diu zaller vrist   [5865]
vil gerlîchen übel ist.
Sô vert si von reht zaller zît
dâ daz niderst übel lît.
    Man würket in alter und in jugent
ein stiege ûz der untugent,   [5870]
diu hât in dirre werlde ein ort
und daz ander hât si dort.
Die staffel sint gemachet gar
von untugenden, daz ist wâr. 
Ein iegelîch untugent hât   [5875]
von des nidersten übels rât.
Die staffel sint nider gekêrt,
wan ir iegelîcher gert,
swer drûf trete, daz er valle nider
unde kome ouch nimmer wider.   [5880]
Ir sult wizzen, swelich man
sich dervor niht hüeten kan,
daz er kumt in kurzer zît
dâ daz niderst übel lît,
wan der man slîfen muoz   [5885]
der ûf die stiege setzt den vuoz.
Man slîfet drabe zaller stunt
von hinne in der Helle grunt.
Ôwê wie snelle man komen mac
dâ nimmer schînt der liehte tac!   [5890]
Man kumt ze Himel sô lîhte niht.
Mich dunkt daz ez dâ von geschiht
daz daz swære schierre vellet nider
dannez müge stîgen wider.
Den man machent swær sîn sunde,   [5895]
daz er vellet lîhte zaller stunde.
Wil er zem oberisten guot
stîgen, er muoz stæten muot
hân: er muoz mit müe dar,
daz geloubet wol vür wâr.   [5900]
Doch ist diu müe gar ein niht,
ob uns ze komen dar geschiht.
Jâ ist reht daz der vehten sol
dem dâ geschehen sol sô wol.
[5.3]   Ich hân iu nu genuoc geseit   [5905]
von zwein stiegn. Diu eine treit 
uns hin zem oberisten guot,
sô wizzet daz diu ander muot
uns ze leiten zaller vrist
dâ daz niderst übel ist.   [5910]
Diu eine ist von tugenden gar,
diu ander von untugenden, daz ist wâr.
Dâ von ist gar nâch mînem muot
diu untugent übel, diu tugent guot.
    Nu sage ich iu waz zaller vrist   [5915]
beidiu guot und ouch übel ist.
Guot und übel heizet wol
daz uns werren unde helfen sol.
Des Tiuvels haken tuont daz,
wan dem wirt gelônet baz   [5920]
der sich sô habet zaller vrist
daz er niht gezogen ist
von den haken dar dâ lît
daz niderst übel zaller zît.
Swer aver sich dar ziehen lât,   [5925]
wizzet daz er gebiten hât
der haken durch unsælikeit:
si ziehent in ze grôzem leit.
Die haken sint rîchtuom, maht,
adel, name, gelust, hêrschaft.   [5930]
Wizzet daz von den sehs dingen
mag einem tôren misselingen.
Si ziehent in vil lîhte dar
dâ er wirt geschendet gar.
Dâ von sint si bercitschaft   [5935]
des nidersten übels.  Er hât die kraft
daz er dâ mit ziuhet einen man,
der sich niht behüeten kan, 
dar er niht varn solde,
ob er rehte varn wolde.   [5940]
Swenn ein guot man varn wil
ûf die stiege diu von vil
tugenden gemachet ist,
die haken sint dâ zaller vrist
und wellent in ziehen wider,   [5945]
daz er zer andern stiege valle nider.
Swer ze der milte und zer diumuot
stîgen wil, hêrschaft unde guot
ziehent in snelle wider:
sô muoz er zer erge nider   [5950]
vallen und ze der übermuot.
Swer milt wil sîn, dem spricht daz guot:
ďDu wilt werden gar ein wiht.
Ein man ist âne guot ze niht
Swer diumüete ist, dem spricht hêrschaft:   [5955]
ďDune hâst deheines herren kraft.
Du möhtest dich schamen hart
und bringet in in die hôchvart.
Swer wirt hôchvertic durch sîn êre,
den vellet sîn êre ze sêre.   [5960]
Swer wil zer dritten staffel komen,
daz hân ich ouch wol vernomen
daz in adel ziuhet dan,
wan ir sult wizzen, swelich man
gedenket wie edel er sî,   [5965]
er gewinnet einen nît dâ bî
daz einem andern man sî baz
denn im erboten, wizzet daz.
Alsô ziuht in zaller zît
adel von liebe hin zem nît.   [5970]
Der kan sich búslîch versinnen,
der daz nîdet daz er solde minnen.
Swer zer vierden staffel komen ist,
den schündet sîn maht zaller vrist 
daz er niemen vertragen sol   [5975]
und ziuht in alsô harte wol
von der senfte hin zem zorn,
sô hât er den strît verlorn.
Swenner vürbaz treten wil
hin zem reht, sô schadet im vil   [5980]
sîn gelust: swer wil gân
nâch gelust, muoz daz reht lân.
Der gelust machet harte sleht
den wec vom reht zem unreht.
Swer zer wârheit komen mac,   [5985]
der hüete sich vor des ruomes slac,
wan ist er ein genanter man
unde vrewet sich dar an,
der lât gern liegen zaller zît,
daz man von im sage wît.   [5990]
Er muoz sich von der wârheit
zer lüge seln und zem meineit,
wan im hebt unhôh ob er liege.
Alsô ziuht in von der stiege
der tugent sîn name wider,   [5995]
daz er zer andern stiege nider
valle.  Des ist er vil gemeit,
der doch niht kumt ûz dem leit:
daz niderst übel mein ich dermite.
Wan der hât sô seltsæne site   [6000]
daz er der liute unsælikeit
sich vreut und hât doch selbe leit.
Lîhte daz er wænet daz
im geschehe dervon baz,
ob uns ouch allen geschiht   [6005]
übel unde guotes niht.
Er triuget sich vast dar an:
ist bî im ein brinnunder man,
er brinnet niht dar umbe min.
Swenn ir ie mêre ist dar inn,   [6010]
sô wæn ich daz daz viuwer ist
mêrer zuo der selben vrist.
Swer grôziu viuwer haben wil,
der leit dar in holzes vil.
Dar umbe sol dehein man,   [6015]
der dehein dinc erahten kan,
sprechen: ďSwâ ich varn sol,
dâ vinde ich gesellschaft wol
wan er dar an niht gewinnet,
der mit vil liuten brinnet.   [6020]
Im wirt dar umbe niht baz,
ir sult mir wol gelouben daz.
Swenner d' andern slahen siht,
daz nimt im sîne nôt niht.
Sîner vorhten wirt halt mêre,   [6025]
swenn man die andern martert sêre.
[5.4]  Mit reht hân ich gezeiget wol
daz niemen gelouben sol
daz uns untugent und übermuot
bringe zem oberisten guot,   [6030]
wan ez muoz guot wesen gar
daz uns von reht sol bringen dar.
Ich zeigte ouch mit schúnem reht
daz uns den wec niht machet sleht
hin ze Helle zaller stunde   [6035]
niwan untugent unde sunde.
Swerz rehte niht vernemen kan,
dem wil ichz anders zeigen, wan
ich wil daz iegelîcher habe daz
daz er mac verstên baz.   [6040]
   Ir sult wizzen ze dirre vrist,
swer ze Himel komen ist,
der muoste ûf der tugende stiege.
Swen des dunket daz ich liege,
der zeige wer ie kúme dar,   [6045]
ern wære tugenthafte gar.
Ob er mirz niht zeigen kan,
sô geloube der selbe man
daz man in alter und in jugent
mac dar niht komen âne tugent.   [6050]
Von wiu kom Abrahâm dar?
Durch sîn gehôrsam, daz ist wâr. 
Moyses durch sîn diumuot
kom zem oberisten guot.
Îob durch sîn gedultikeit.   [6055]
Finêes, wan im was leit
daz man zebrach Gotes gebot.
Von wiu kom Îsââc ze Got?
Von sîner kiusche, daz ist wâr.
Von wiu kom Jâcob dar?   [6060]
Durch sîn einvalt. Durch reinikeit
wart ouch Ênoch dar beleit.
Jôseph der galt vür übel guot
und kom zem oberisten guot.
Seht, die sint alle komen dar   [6065]
niht durch eine tugent, daz ist wâr,
doch erschein ein iegelîcher baz
an der tugent, wizzet daz,
die ich iu vor genant hân.
Swer aver wil ze Himel gân,   [6070]
der muoz die tugende haben gar,
daz geloubet wol vür wâr:
er muoz si hân gemeinlîche,
mag ers ouch niht hân genzlîche.
   Ein ieglîch man tugenthaft   [6075]
hât an einer tugent grúzer kraft
dan an der andern: daz geschiht
dâ von daz wir mugen niht
die tugent hân volleclîchen.
Wer mac sich hin ze Got gelîchen   [6080]
der die tugent hât vil gar
und volleclîchen?  Daz ist wâr,
er hete grúzer gehôrsam
dan der gehôrsame Abrahâm. 
Er hete ouch grúzer diumuot   [6085]
danne Moyses, der guot.
Er was kiuscher dan Îsâc:
Jâcobs einvalte an im lac.
Sô wizzet vür die wârheit,
er hete grúzer dultikeit   [6090]
dan Îob.  Jôseph galt nie baz
den vînden dann er, wizzet daz.
Sît er die tugende alle hât,
sô wizzet ouch, swer ze im gât,
der muoz vil tugende hân.   [6095]
   Swer hin ze Helle welle gân,
der sol sîn untugenthaft.
Die untugende habent wol die kraft
daz si in dar bringent harte wol
dar ein guot man niht varn sol.   [6100]
Wer kom ie in der Helle grunt
niwan durch untugent und durch sunt?
Nu sage, war umbe kom dar in
Nemrôt und ouch Kâyn
niwan durch übel und durch sunde?   [6105]
Swer übel tuot zaller stunde,
dem sol von rehte übel geschehen.
Wir haben ez ouch dicke gesehen
daz in unsælde ofte geschiht
und bezzern uns dervon niht.   [6110]
   Wir wænen durch rîchtuom und durch guot
stîgen zem oberisten guot.
Wir wænen daz uns gebe kraft
hêrschaft, adel, name, maht,
daz wir komen hin ze Got.   [6115]
Wir machen ûz uns selben spot: 
ir sult gelouben wol vür wâr
daz wir sîn betrogen gar.
Nêrô læg ze dirre stunde
niht in der Helle grunde,   [6120]
ob sîn rîchtuom und sîn hêrschaft
im möhten geben solhe kraft
daz er möhte ûz komen.
Ern wirt sô niht ûz genomen:
wan swer gæb ze dirre vrist   [6125]
swaz guotes in der werlde ist,
der Tiuvel gæbe ein sêle niht
her ûz, diu im ze hân geschiht.
Dar umbe sol dehein man
an sînem rîchtuom trôst hân.   [6130]
   Ich hân gehôrt grôz nerrischeit,
daz ein man hât geseit:
ďIch mac wol tuon swaz ich wil,
wan ich hân guotes alsô vil
daz ich ledege mîne sunde   [6135]
mit mîme almuosen zaller stunde
Swer dar ûf sünden wil,
sîn almuosen hilfet in niht vil:
Got der læt sîn geriht
durch sînes guotes willen niht.   [6140]
Jâ ist gar in Gotes hant
beidiu Himel unde lant:
er bedarf sîns guotes niht.
Zwiu lieze er danne sîn geriht?
Ern tuot ez niht, weiz Got, nein er:   [6145]
er ist niht einer der rihtær
daz er daz unreht mach ze reht
weder durch herren noch durch kneht. 
Er entuot durch niemens guot
anders dann er von rehte tuot.   [6150]
Idoch sult ir wizzen wol
daz man durch Got geben sol.
Man sol aver mit den gedingen
niht volgen búsen dingen,
daz manz ze Got erkoufen wil   [6155]
daz man begê unrehtes vil.
Wan dâ mit tuo wir diu glîche,
sam Got niht sî genuoc rîche,
und daz der habe niht
derz allez gît, swaz uns geschiht   [6160]
in dirre werld ze vreuden hân.
   Hie wil ich iuch wizzen lân
daz der rîchst der inder leben
mac, der mac nimmer gegeben,
ez enmüge wol alsô vil   [6165]
ein arm man geben, ob er wil,
ich meine daz im wirt alse guot:
wan Got siht niwan an den muot.
Swer zehen tûsent marc hât,
ob er tûsent durch Got lât,   [6170]
sô hât getân dan alsô vil
der einen phenninc geben wil
von zehen phenningen die er hât,
wan er den zehenden ouch verlât.
Swer nâch sîner maht tuot,   [6175]
Got der hât ez wol vür guot.
Swaz der arm gît und der rîche,
deist im von bêden liep gelîche.
Gebent siz mit reinem muot,
sô dunkt in einz undz ander guot.   [6180]
Ir sult wizzen daz ein man
der nie dehein guot gewan,
der mac geben die werlde gar
durch Got, daz geloubt vür wâr.
Swaz man mit dem willen lât,   [6185]
wizzet daz manz gegeben hât,
sam manz gæbe ûz der kamer sîn,
daz macht Got mit dem bilde schîn.
   Dô der künic Salomôn
Gotes hûs machet, dâ het sîn lôn  [6190]
ein arm wîp grúzer danne er,
wan si gap mit ir willen mêr.
Seht, dâ wurden widerweget
tûsent marc die man leget
wider einn phenninc: der rîche   [6195]
gap vil, doch wart im gelîche
daz arm wîp mit ir gâbe kleine,
wan ir herze was vil reine.
Unser herre siht ze dem muote
baz dan ze deheinem guote.   [6200]
Ir sult wizzen daz Got gît
dem guot, dem armuot zaller zît;
dâ von er niht enkelten lât
einn man, ob er niht guotes hât,
und machet daz dem hilft sîn muot   [6205]
gelîche alsam disem sîn guot.
Ir sult wizzen daz der vischære
sô hôhe niht gestigen wære,
ob man durch rîchtuom dar solt komen.
Wan wâ hiet er sô vil genomen   [6210]
daz er möht koufen daz rîche
dem dehein rîche ist gelîche? 
Möht ez koufen dehein man,
sô möhtz der keiser Julîân
ouch hân gekouft, der zaller stunde   [6215]
brinnet in der Helle grunde.
   Hie bî muget ir wizzen wol
daz sich niemen trústen sol
und daz niemen sol gedingen
daz in sîn rîchtuom müge bringen   [6220]
hin ze Got: uns muoz dar
bringen der tugende schar.
Der keiser Constantîn was
rîche genuoc, der dâ genas
durch sîn tugent niht durch sîn guot.   [6225]
Die wîle dô im was ze muot
daz er wolde der kinde tôt,
dô half im niemen ûz der nôt.
Do er den siechtuom wolde lîden,
ê er wolt diu kint zersnîden,   [6230]
dô half im Got harte schier.
Merken dâ bî suln wier
daz er ze Got niht komen ist
durch rîchtuom, sît er zeiner vrist
durch rîchtuom niht mohte genesen,   [6235]
als wir an den buochen lesen.
Waz hât in danne brâht ze Got?
Daz er wart leistent sîn gebot
und daz er wart tugenthaft.
Got durch die tugende gab im kraft   [6240]
daz er hin zim möhte komen,
als wir dicke hân vernomen.
[5.5]  Nu hân ich iu geseit wol
wâ von man tugent minnen sol, 
wan unser gemeiner herre   [6245]
minnet die tugent harte verre.
Ein ieglîcher möht sichs schamen vil,
der dem herrn niht volgen wil.
Der mac sichs aver schamen mêre,
dem Got hât gegeben maht und êre,   [6250]
ob er dem herrn niht volgen wil
der im hât gegeben êren vil.
   Unser herr gît dicke êre
dem der sich selben schendet sêre:
sô mag er ouch niht herre sîn.   [6255]
Daz ist dar an wol worden schîn
daz er dem herrn niht volgen wil
der uns gît hêrschefte vil.
Sît er sîm herren nimt sîn reht,
sô mag er ze sînem kneht   [6260]
dehein reht von rehte hân.
Wie möhte dan der selbe man
von rehte sîn eins landes herre,
der daz verworht hât sô verre
daz er an sînem eigen kneht   [6265]
von rehte niht mac hân sîn reht?
   Swer sîn hêrschaft alsô hât
daz er nâch rehte niene gât,
der hât mit unreht sîn hêrschaft:
uns tuot gewalt ouch sîn kraft.   [6270]
   Der tuot uns gewaltes vil
der uns von Got scheiden wil.
Daz tuot ein unrehter herre,
der scheidet uns von Gote verre
mit sîner untugende kraft,   [6275]
wan er macht uns untugenthaft. 
Weiz Got der herren ist ze vil,
vür wâr ich ez iu sagen wil,
die uns machent untugenthaft
mit ir untugende kraft.   [6280]
   Wâ von mac man niht vinden hiute
alsô tugenthafte liute
alsô man hie bevor vant?
Daz mag ich iu sagen zehant:
die herren wâren tugenthaft,   [6285]
sô liebte den andrn ir tugende kraft
daz si vüeren nâch der tugent
beidiu an alter und an jugent.
Nu habent si verkêrt ir site,
dâ müeze wir ouch varen mite.   [6290]
   Ein ieglîch man tuot gerne daz
dâ von man in handel baz.
Man handelt tugenthafte liute
bî alten zîten baz dan hiute,
dâ von wurvens vast nâch tugent.   [6295]
Nu handelt man baz die untugent
dan die tugent, daz ist wâr,
dâ von dring wir alle dar.
   Kumt ze hove ein biderbe man,
den wil der herr niht sehen an:   [6300]
kumt aver dar ein búsewiht,
der kumt ân êre wider niht.
Ob ein vrum man ze hove wære,
kúm danne dar ein wuocherære,
man hiet den biderben man vür niht.   [6305]
Als der búse herre siht
den wuocherære, gewislîchen,
im muoz der biderbe man entwîchen. 
Sô gedenket lîht dâ bî
ein man: ďMöht ich sô rîche sîn  [6310]
als dirre ist, man êrt mich ouch:
sus hât man mich vür einen gouch,
swie biderbe und swie wîse ich bin.
Ich muoz kêren an gewin
mînen sin und mînen muot.   [6315]
Ich sihe wol daz der tuot
swaz er wil, der guot hât.
Man húret gerne sînen rât.
Ich muoz werdn ein búsewiht:
ich erwirb mit vrümkeit niht.Ē   [6320]
   Seht, daz ist der herren schulde!
Ich sol verliesen niht ir hulde
dar umbe daz ich sage daz:
ich wolde daz si tæten baz.
   Wâ ist Êrec und Gâwân   [6325]
Parzivâl und Îwân?
Ich weiz si ninder.  Daz geschiht
dâ von daz wir haben niht
Artûs inder imme lant.
Lebt er, wir vunden sâ zehant   [6330]
in der werlde rîter gnuoc
die sô vrum sint und gevuoc
daz mans möht heizen Îwæn,
als mich dunkt und als ich wæn.
Vür wâr ich ez iu sagen wil,   [6335]
man vunde noch der rîter vil,
daz si an der tugende wec
uns möhten wol erstaten Êrec.
   Wâ sint sî verborgen denne,
daz mans niht vindet etewenne?   [6340]
Die vrumen sint verborgen gar,
daz geloubet wol vür wâr.
Swer nu niht verborgen ist,
wirt missehandelt zaller vrist.
Der búsen liute ist sô vil   [6345]
daz sich der vrume niht zeigen wil.
Wizzet daz der vrum man ist
der búsen iule zaller vrist.
Ob si in sæhen etewenn,
si schriren alle über den,   [6350]
si træten ûf in mit den vüezen:
nu seht ob er sich bergen müeze!
Ob si die herren vinden wolden,
sô sag ich iu daz si solden
êren tugenthafte liute,   [6355]
sô vunden si vil lîht noch hiute
die des vil wol wæren wert
daz man si stunt solt hân geêrt.
Die búsen liezn ir bôsheit,
ob in die herren tæten leit.   [6360]
Ein man tæt dicke daz er solde,
ob man in dâ von êren wolde.
Die herren mugen schaffen wol
daz man tuo daz man tuon sol.
Wie mugen si tuon daz?   [6365]
Êren die vrumen baz
dan die búsen: wizzt vür wâr,
si lâzent ir bôsheit gar.
Ob aver daz nu niht geschiht,
si sint des âne schulde niht.   [6370]
[5.6]  Daz ich von rîtern hân geseit,
daz sol man von der phafheit
ouch verstên: deheiner wil
nâch der kunst streben vil. 
Nu war umbe tuont si daz?   [6375]
Dâ handelt man si deste baz.
Ob si nâch kunst wolden streben,
sô möhten si niht wol geleben
dar nâch und ir herre lebet,
der niwan nâch untugenden strebet.   [6380]
Ein ieglîch man varn muoz
nâch sînes herrn untugende vuoz,
wil er von im gewarten iht,
ode er gît im nihtes niht.
War umbe solde dan ein man   [6385]
ze schuole varn, sît er kan
wol untugenthaft wesen?
Wer solt dâ von ze schuole lesen?
Man lernet lôsheit dâ heim wol,
dâ mite man ze hove sol   [6390]
werven pharre unde phruont.
Seht, wie wol die bischolf tuont,
swer si sîn, die dâ gebent
kirchen den die alsô lebent!
Seht, dâ mit hânt si gemachet   [6395]
daz niemen durch lernunge wachet.
Swer sînen herren lobet vil,
swaz er tuot, slâfe swenner wil.
Der ist hüfsch unde gevuoc,
dem sol man geben ouch genuoc.   [6400]
Der ďJâ, herreĒ sprechen kan,
der mac wol sîn ein biderbe man.
Seht, daz hât die phaffen gar
træge gemachet, daz ist wâr,
daz si die kunst ze rükke werfent,   [6405]
wan si dermite lützel wervent.
Seht, daz ist gar der herren schulde:
ich hânz gesprochen mit ir hulde.
   Wâ ist nu Aristôteles,
Zênô und Parmenides,   [6410]
Platô und Pytâgoras?
Wâ ist ouch Anaxâgoras?
Nu wizzet daz mich dunket des,
und lebt hiut Aristôteles,
im entæt dehein ander   [6415]
künic daz im Alexander
ze êren tet di wîl er lebt.
   Swer selbe gern nâch êren strebt,
der minnet ouch biderbe liute.
Die wîsn und biderben die sint hiute   [6420]
âne lop und âne prîs.
Die wîsen hât der unwîs
mit sîner kraft genidert sêre.
Der búsen ist sô vil mêre
daz die vrumen sint ze niht.   [6425]
Der búse ist wert, daz geschiht
dâ von daz die hôhen tann
sint zem mose komen, wan
daz mosgras ist nu gestigen
ûf zem gebirg: nu müezen ligen   [6430]
die geslahten boume nider.
Daz ist geschehen stunt; sider
wart diu werlt âne geriht
und ân êre.  Daz geschiht
von diu daz man ist den búsen holt.   [6435]
Die unedeln stein sint in daz golt
und in diu vingerlîn gesprungen.
Die edeln stein sint ûz gedrungen.
Die schamel die dâ solden ligen
under den benkn, die sint gestigen   [6440]
ûf die benke: diu banc ist
ûf dem tisch ze langer vrist. 
   Der unwîse wîses zungen hât.
Der wîse kan niht geben rât.
Vür den alten dringt der junge.   [6445]
Daz vihe hât eines mannes zunge
erwischet und wænt sprechen wol.
Ein iegelîch man der sol
hinne vür sîn zunge hân
stille und sol daz vihe lân   [6450]
reden, daz ist worden reht.
Der herre sol êren den kneht.
Die rîter suln gên ze vüezen,
von reht die loter rîten müezen.
Der heilege wîssage sprach   [6455]
daz er die schalke rîten sach,
dô die herren muosten gên.
Daz sol man alsô verstên
daz die búsen habent êre,
die vrumen sint genidert sêre:   [6460]
daz ist nu allez worden schîn.
War umbe sol daz alsô sîn?
Dâ habent die untugenthaft
in der werlde meisterschaft.
Wie?  Habt ir mich niht vernomen   [6465]
daz die bercboume sint bekomen
her abe zem mos?  Dô daz mosgras
her abe in dem mose was
und dô die schamel nider lâgen
und dô wir hôher tische phlâgen   [6470]
und niderre benke, wizzet daz,
daz diu werlt dô stuont baz.
Dô tet der herre und der kneht
daz si solden tuon von reht. 
Ein ieglîcher het sîn zunge,   [6475]
bêde der alte und der junge;
beidiu daz vihe und der man
heten daz si solden hân;
bêde der wîse und der unwîse
heten ir prîse und ir unprîse.   [6480]
Die edelen steine muosten sîn
in den guldînen vingerlîn:
dô wârn die unedelen steine
allenthalben gar gemeine.
Seht, dô stuont diu werlt wol.   [6485]
Wîse liute minnen sol
swer in der werlt wil sîn geriht
und sîn êre minnern niht.
   An sin mag man niht gewinnen
daz stæte sî: man sol minnen   [6490]
sin unde den der sin hât,
daz ist mîn wille und mîn rât.
Alexander minnete vast,
swenn im zuo kom ein wîser gast.
Im wâren liep wîsiu liute,   [6495]
dâ von seit man von im hiute.
Sîn meister Aristôteles
der bewîste in alles des
swaz er tet ze grôzen dingen.
Wie möht dem manne misselingen   [6500]
der wîse liute bî im hât
und tuot gar nâch ir rât?
Des tuont nu die herren niht,
dâ von in dicke schade geschiht.
   Ob die herren strebten baz   [6505]
nâch êren, sô wær ir reht daz, 
daz si den vaste helfen solden
die ze schuole varen wolden.
Wizzet daz in eins mannes jugent
verderbent dicke sin und tugent,   [6510]
der ze schuol niht mac gesîn.
Hulfez, daz wær der rât mîn
daz man dem schuoler helfen solde
ze schuole, der gerne lernen wolde.
Des entuot man leider niht,   [6515]
wan sît den herren daz geschiht,
daz si die wîsn niht wellent sehen,
sô mag ich des vür wâr gejehen
daz si dar ûf niht wellent wachen
daz si wîse liute machen.   [6520]
   Hie sint gemeint die herren gar,
doch sult ir wizzen wol vür wâr
daz ich ez hân gesprochen mêre
durch die bischolf die ir êre
dâ von genomen hânt von Got   [6525]
daz si suln sîn gebot
leisten und sîn ê ervollen:
wan ez ist in verre enpholhen.
Gebrist uns amme gelouben iht,
lîht daz ez dâ von geschiht   [6530]
daz wir nien haben predigære.
Dâ von swer guot bischolf wære,
der solt sich vlîzen zaller zît,
swenner unnützlîchen gît,
daz erz dem geben solde   [6535]
der ze schuol gern varn wolde.  [6536]
    Wan der muz haben etewas [6536a]
    der ze schul ist, wizzet das. [6536b]
Seht, tæte er daz, ez wære guot;  [6537]
wan des er selbe niht entuot, 
daz möht dirre wol ervollen,
ob ez im würde lîht enpholhen.   [6540]
   Seht, wie der bischolf hât behuot
sîn ê unde ouch sîn guot,
der selbe niht gepredegen kan,
und swâ er weiz einen man
der gerne lernt, dem hilft er niht!   [6545]
Wizzet ir wâ von daz geschiht?
Er wil daz sîne phaffen gar
sîn âne kunst als er, deist wâr.
Des entuot ein blinde niht:
wan ein man der niht gesiht,   [6550]
dem ist doch liep zaller vrist,
ob ein gesehender bî im ist.
Der bischolf, daz er solde geben
den die ze schuol hânt armez leben,
daz gît er den die umbe in   [6555]
strebent mit girde nâch gewin
unde ahtet dar ûf nihtes niht
waz dem armn ze schuole geschiht.
   Seht wie si Gotes ê behabent,
die Gotes ê enphangen habent,   [6560]
daz die ze schuole verderbent
die umbe Gotes ê werbent,
und der dâ heim unnütze ist
und ouch müezec zaller vrist,
dem gît ein herre swaz er wil.   [6565]
Dem gevellet lützel, disem vil.
Dem gevellet lützel, wan er enmac
vor hunger lernen durch den tac.
Sô schadet vil disem ouch:
swenn man ie mêr gît einem gouch,   [6570]
sô er ie mêr nâch guote strebet
und enruochet wie er lebet.
Seht wie der herre teilet wol
daz er nâch rehte teilen sol!
Er ersticket einen mit guot   [6575]
und læt den andern mit armuot
ân guote kunst gar verderben,
der wol kunst kan erwerben.
Wirt danne von sînen schulden niht
der und dirre ein búsewiht?   [6580]
[5.7]  Nu wil ich iu noch sagen mêre
daz die vrumen müet vil sêre.
Swenn si von schuole komen sint,
sô hât man dâ ze hove ein rint
baz danne si.  Swer rîcher ist,   [6585]
der sol sîn tiwerre zaller vrist.
Ir sult gelouben wol vür wâr
daz uns daz hât gemachet gar
ungenæm kunst unde sin:
wir werven alle nâch gewin.   [6590]
Seht, daz ist der herren schulde:
wolden si haben Gotes hulde,
sô solden si einn ieglîchen man
dar nâch handeln und er kan
und nâch sîm tugenthaften muot   [6595]
und dar nâch unde er getuot.
Sô würve wir alle nâch tugent
beidiu an alter und an jugent:
wir würven alsô gern nâch sin
als wir tuon nâch gewin.   [6600]
Sô wære ouch triuwe und wârheit
mêr zwischen der Kristenheit. 
   Ez wær mîn rât, ob si wolden,
daz die herren ervarn solden
wer in ir lant guot sinne hât,   [6605]
und daz si in gæben rât
und helfe, und daz si sîn
der lernunge zallen zîten bî:
wan von den wîsen liuten sol
werden diu werlt berihtet wol.   [6610]
    Wâ von stuont diu werlde baz
hie vor dan nuo?  Wizzet daz,
dâ het man dô grôze minne
hin zer tugent und hin zem sinne.
Nu strebt ein ieglîch man sêre   [6615]
dar nâch wie er gewinne mêre.
Der gewinnt nu alsô drât
êre der sich an muoze verlât,
alse der der zaller vrist
mit lernunge unmüezec ist.   [6620]
   Müezec ist ein ieglîch man
der guotiu dinc niht vrumen kan.
Der ist überic, swemz geschiht
daz er nâch tugent wirvet niht.
Swaz er anders iht getuot,   [6625]
daz enmac niht wesen guot.
Der ist ein unmüezic man
der iht guotes werven kan.
Swer übel tuot zaller vrist,
wizzet daz der müeziger ist   [6630]
dan der der nihtes niht entuot.
Swer mit bôsheit erwirvet guot,
der hâtz erworven gar mit muoz:
wizzet daz man alsô nu werven muoz. 
   Seht, dar umbe daz man siht   [6635]
daz die vrumen wervent niht,
dâ von well wir búse sîn.
Doch wære daz der rât mîn
daz wir die tugende niht verliezen,
swie wir sîn lützel niezen.   [6640]
Seht, daz mac aver niht gesîn:
wan ist tunkel der sunne schîn,
wie mac der mâne liuhten denne?
Ob daz geschæhe etewenne
daz in dem mer niht wazzers wære,   [6645]
daz wære ein seltsæne mære,
ob die bache runnen vol:
ich wæn ez niht geschehen sol.
Wie möht aver geschehen daz,
daz der beleitet wirt vür baz   [6650]
dan der in leite?  Ez mac geschehen
doch niht ze wol, ich mac sîn jehen.
   Ein túrscher vener vüeget daz,
daz ein her möht tuon baz.
Swer ein her niht bewîsen kan,   [6655]
der mac verderben manegen man.
Sîn rîter vüert der túrsche herre
dicke undr die Vînde verre:
werdent si gevangen dâ,
si tuont dem herren wirser sâ   [6660]
dan den andern, wan er ist
der d' andern reizet zaller vrist.
Der herre wirt behüetet baz,
doch sult ir ouch wizzen daz,
daz man die andern læzet niht.   [6665]
Von reht dem herren wirs geschiht, 
der uns an übeliu dinc verleit:
wir werden ouch mit im gebeit.
   Doch wirt daz bat vil ungelîche:
man bringt ein stuol, viuwer rîche   [6670]
brinnende, daz der herre sitze:
waz mac ich des, schât im ditze?
Der stuol wirt uns niht gemeine:
wir sitzen sus ûf warmen steine.
Man begiuzt den herren vomme gebel   [6675]
mit wallendem pade, peche und swebel,
und rîbt im abe mit grôzem vlîze
hût und vleisch, sô wirt er wîze,
und giuzet aver ûf daz gebeine
daz heize pat, daz er sich reine.   [6680]
Daz unser wirt heiz niht sô harte,
doch vellet dervon hâr unde swarte.
Man wadelt uns vil arme liute
mit geiseln, daz uns vallnt die hiute.
Dem herren bringet man snellîche   [6685]
guote wedel harte rîche,
keten geknüphet amme ort:
ich mac sîn niht, hât er sîn vorht.
Man wadelt in umb sîn gebeine,
daz im blîbet ganz ninder deheine,   [6690]
sô muoz her ûz marc vür den sweiz:
ich wæn im werde genuoc heiz.
   Von unserm muot sol niht belîben:
daz starke pat ez sol vertrîben
unde waschen alle untugent   [6695]
beidiu an alter und an jugent.
Man mac daz pat schiuhen wol
dâ pech und swebel wallen sol, 
swer niht enswerzet sîn getât
mit swarzem peche der missetât;   [6700]
swer niht machet stinkend daz er tuot
mit dem swebel sîner unguot.
Man mac die keten schiuhen wol,
swer daz tuon wil daz er sol.
Wizzet daz diu keten ist   [6705]
geworht mit vlîze und mit list,
mit der man uns binden sol
und slahen, tuo wir hie niht wol.
Swer die keten vliehen wil,
der sol niht ahten ze vil   [6710]
ûf der keten undergebende,
sô kumt er âne missewende
von der untugent keten wol,
als ein biderbe man sol.
Swer die keten niht vliehen wil,   [6715]
der bint sich mit untugende vil
die in ze jungest ziehent dar
dâ er wirt gebettet gar
mit unsælde und mit leit,
daz wizzet vür die wârheit.   [6720]
   Ich hânz geseit vor langer vrist
wie diu keten gevlohten ist,
und wie rîchtuom, glust, hêrschaft,
maht, name, adel habent kraft
daz si die untugent gar   [6725]
underbindent, daz ist wâr.
Seht, daz sint diu underbant,
diu sol man schiuhn: swer stiuvels hant
vliehen wil, der muoz gar
diu sehs dinc schiuhen, daz ist wâr.   [6730]
Si underbindent die untugent
beidiu an alter und an jugent.
Wær niht rîchtuom unde guot,
sô wære girde und übermuot
ân underbant.  Wær niht hêrschaft,  [6735]
waz möhte dan hân solhe kraft
daz übermuot und smâcheit
möht underbinden sô gereit?
Nu sage mir, wær niht diu maht,
waz hiet danne solhe kraft   [6740]
daz ez verbunt die üppikeit
aver zuo der smâcheit?
Wær niht name, waz möhte denne
die túrscheit etewenne
verbinden zuo der üppikeit?   [6745]
Waz möht gelust und túrscheit
verbinden baz dan adel tuot?
Niht, mich entriege dan mîn muot.
   Nu sî wir zuo der keten knûre
diu an ir ort von ir natûre   [6750]
hât unkiusche unde trâkeit,
vrâz unde trunkenheit.
Diu keten die wir mit untugent
vlehten an alter und an jugent,
diu wirt ze Helle stælîn gar,   [6755]
daz geloubet wol vür wâr.
Seht, dâ mit wadelt man wol
swer dâ ze Helle paden sol.
Mich dunket, der habe einn wîsen rât,
der sich hie sô paden lât   [6760]
daz er niht kumt an die stat
dâ man bereitet stiuvels bat.
   Swer ze vrôn hove komen sol,
der sol sich paden harte wol:
mit tugenden und mit güete   [6765]
sol er baden sîn gemüete.
Daz pat sol heiz werdn von minne,
wan er sol hân wol die sinne
daz er Got minnen sol
und die liut, sô kan er wol   [6770]
sîn bat heizen, daz ist wâr.
Dâ sol er sich inne paden gar,
sô wirt im daz bette bereit
da er lît immer âne leit.
Er vert ouch dan ze hove baz   [6775]
und vlæticlîcher, wizzet daz.
Swer zunsers herren hove sol,
wil er sich hie niht baden wol,
der scherge enlæt in niht dar,
ern pade müezeclîchen gar   [6780]
von dem houbt unz an den vuoz.
Daz pat er danne erleiden muoz.
Von dem ich iezuo hân geseit:
wê dem der sich drinne beit!
   Hie sult ir ouch wizzen wol   [6785]
daz man der tugende keten sol
ouch vlehten mit sehs dingen
diu uns ze Got suln bringen.
Die tugende müezen zaller zît
mit den untugenden haben strît,   [6790]
alsam muoz âne missewende
sîn widerwertic ir undergebende.
Der untugent keten ziuht uns nider,
sô mag uns unser herre wider 
mit der tugent keten ziehen wol:   [6795]
wol dem der im volgen sol!
    Ir habt daz vümfte teil vernomen:
ich bin an daz sehste komen.