Der Welsche Gast - VI

by Thomasin von Zerklaere

ed. HEINRICH RÜCKERT 
(Quedlinburg/Leipzig 1852)

 machine-readable text by Minoru Shigeto (Tokyo, 1997)
conversion from TUESTEP format by Uta Recker (Tübingen, 1999)
corrections and HTML rendering by Steven M. Wight (Los Angeles, 1999)
Prosa Prolog -
Teil 1 - Teil 2 - Teil 3 - Teil 4 - Teil 5 -
Teil 6: [6.1][6.2][6.3][6.4][6.5][6.6]- Teil 7 - Teil 8 - Teil 9 - Teil 10






[6.1]  Daz man von tugent komen sol
hin ze Got, daz ist wol   [6800]
geseit gar nâch mînem wân.
Ich weiz daz ich gesprochen hân
wie uns untugent unde sunt
bringet in der Helle grunt.
Ich seit daz tugent minnet Got   [6805]
und swer wil leisten sîn gebot,
und seit daz man vür niht hât
swer volgen wil der tugende rât.
   Hie wil ich manen hiute
alle tugenthafte liute   [6810]
daz si an tugent verzagen niht.
Wan ob daz ein wîle geschiht
daz man si niht nâch rehte hât,
sô wizzet doch, swer mit rehte gât,
der sol ze jungest dringen vür   [6815]
hin ze der sælikeite tür.
   Ein stat gevangen wart
von ir vînden, dô vluhen hart
die man in der stat vant:
si truogen phenninge unde gewant.   [6820]
Dô was ein man under in,
der het den wîstuom unde den sin
daz er niht wolde tragen:
die andern vuoren gar geladen.
Einer vreite in zwiu er tæte daz,   [6825]
dô antwurte er im baz 
danner vrâgte: er sprach Mîn muot
treit mîn phenninge und mîn guot.
Er meinte sîne tugent dermite,
sînen wîstuom und sîn schne site:   [6830]
daz was doch ir aller spot.
Dô reit nâch des herren bot
der die stat hete behert
und viengens alle an der vert,
wan si wârn geladen hart.   [6835]
Der ein der niht truoc an der vart,
der was ringe und kom wol hin,
wan wîstuom, tugende unde sin
müezen ze jungest brechen vür,
swie lange si sîn vor der tür.   [6840]
   Ein wîle müezn die tugenthaft
lîden von der untugende kraft
nôt, leit, arbeit, spot,
daz verkêrt doch allez Got.
Wan swer mit Got varen wil,   [6845]
er bringet in dar dâ er vil
hêrschaft gewinnet: gwislîchen,
im mac diu sælde niht entwîchen.
Ir sult wizzen wol vür wâr,
und ist er hie niht sælic gar,   [6850]
daz er dâ sælic werden sol
dâ ez im tuot rehte wol.
Ez ist in dirre werlde geschehen
ouch, des mag ich wol gejehen,
daz dem unser herre Got,   [6855]
der dâ leistet sîn gebot,
hât hêrschaft vil gegeben
durch sîn tugenthaftez leben:
wan durch eins mannes senften muot
gît er im dicke hie grôz guot.   [6860]
Er galt Îob gewislîchen
daz er verlôs zwivalticlîchen.
Swer ot stæte an tugenden ist,
im wirt wol zetlîcher vrist.
Daz was an Jôseph grôz tugent   [6865]
die er het in sîner jugent,
daz in Êgipt sîns herren wîp,
diu harte schn was an ir lîp,
bat daz er bî ir wær gelegen,
daz er nien wolde untriuwe phlegen.   [6870]
Des kom er sît in grôze nôt,
doch half im Got ûzem tôt.
Daz ist wâr daz er leit
lange nôt und arbeit,
doch wart ez im erstatet gar,   [6875]
daz ist gewislîchen wâr.
Er wart ein herre über den
der in niht wolde etewenn
koufen, daz er wær sîn kneht.
Er wart verkouft doch âne reht   [6880]
und tet dar nâch den êre und guot
die in durch ir nîdigen muot
heten verkouft unde versant
verre in ein ander lant.
Seht wie er dannoch dranc vür   [6885]
ze jungest hin zer sælden tür.
   Moyses alsam geschach:
wan dô er ein kint gesach
der sînen bruoder slahen wolde
und sprach daz erz niht tuon solde,   [6890]
dô sprach daz kint untugenthaft
Wir wellen niht dîn meisterschaft. 
Wer hât dich uns ze meister geben,
daz wir nien mugen vor dir leben?
Den diu kint niht wolden hân   [6895]
vür meister, dem wart undertân
daz israhêlisch volc gar,
daz wizze wir alle wol vür wâr.
Den kinden versmâht sîn meisterschaft,
dô kom von unsers herren kraft   [6900]
daz er den vatern wart gegeben,
daz er meistert gar ir leben.
Den die jungen und die tôren
nien wolden volgen noch hôren,
dem volgten alte und wîse liute;   [6905]
seht, daz ist geschriben hiute.
   Dâ von sol dehein man,
der an tugent ahten kan,
dar ûf gedenken unde wachen
wie si mügen daz gemachen   [6910]
daz si grôze hêrschaft gwinnen.
Man sol dar nâch lân Got ringen,
und sol sînn sin wenden darzuo
gar daz man rehte tuo.
Swer gedenkt wier gwinne hêrschaft,   [6915]
der krenket sich an der tugent kraft:
er solde Got lâzen schaffen,
der Dâvît nam von den schâfen,
daz er in erwelte, ob er wolde,
sô km er zêren als er solde:   [6920]
der sich selben biutet dar,
der wænet sîn tugenthaft gar
und ist gar untugenthaft.
Swer genôte wirvet umb hêrschaft, 
mich dunkt daz er sich selben welt,   [6925]
ob irz reht verstên welt.
Swelich man alsô tuot,
dunket sich derzuo unnütze od guot.
Ob er sich unnütze dunket iht,
er solde der hêrschaft gern niht.   [6930]
Dunkt aver er sich nütze und guot,
sô habe dannoch ein solhen muot
daz er wizze daz ez lîhte geschiht
daz Got wil verhengen niht
daz dâ sî ein nützer herre:   [6935]
daz volc hâtz lîht verworht verre.
Dâ von strebe niemen nâch sô hart
daz er kom ûz der tugende vart
und daz er tuo wider Got.
Ez ist sîn wille und sîn gebot   [6940]
daz man sînem willen warten sol,
wan ob erz wil, er vüegetz wol.
Ouch sag ich iu daz ez dicke geschiht
daz einer ist nütze niht
und wænet doch sîn nütze gar:   [6945]
ein trscheit ziuht die andern dar.
Daz ist des unwîsen wîse
daz er wænet er sî wîse.
Got phlegt selbe ze wîsen
die guoten unde die wîsen   [6950]
ze êren und ze hêrschaft.
Er hât die liste und die kraft
daz erz baz vüegen kan
danne deheiner slahte man.
Swenn man ie min hât dâ den muot,   [6955]
sô wizzt ouch daz erz schierre tuot. 
Muget ir merken wie grôz hêrschaft
er vuogt Jôseph mit sîner kraft,
daz er wart, als ir habt vernomen,
ûzem karker zeinem herrn genomen?   [6960]
Dô er sîn getroute min,
dô gab im Got den gewin.
Moyses wart ein herre gar,
dô er wider kêrte dar
danne er ê wart vertriben.   [6965]
Disiu Gotes wunder sint geschriben.
Dâ von ein ieglîch man tuo
daz er der tugende kome zuo
und lâze umb sîn êre sorgen Got
und sorge nâch tugent, deist sîn gebot.   [6970]
   Der künic Dâvît ouch erleit
vil kumbers und vil arbeit
ê er zem rîche komen wære.
Er was sîm vorvarn unmære,
dem künege Saul der zaller zît   [6975]
ûf in truoc zorn unde nît.
Er leit von im grôze nôt
und wart doch künec nâch sînem tôt.
Seht, der dranc ouch ze sælikeit
vür durch sîn gedultikeit.   [6980]
Ern wolde sich niht gerochen hân,
do erz möht dicke hân getân.
Got selbe der wil sich niht
zehant rechen: swem daz geschiht
daz er senfte und dultic ist,   [6985]
der volget Got zaller vrist.
[6.2] Ja ist reht daz der unwîs,
der selbe hât deheinen prîs, 
die vrumen niht prîsen sol.
Swer einn vrumen man kan prîsen wol,   [6990]
wizzet daz wol vür wâr,
der sol sîn tugenthaft gar.
Anders kan er gescheiden niht
den vrumen von dem bsewiht:
wan ein untugenthafter man   [6995]
niht anders erahten kan
niwan daz zuntugenden hret:
sîn meister hât in sô betret.
Der selbe ist ein bsewiht,
der erkennt die vrümkeit niht.   [7000]
Wie solde erkennen ein man
daz er selbe nie gewan?
Er kan sîn guot und sînen gwin
ahten, daz ist sîn bester sin.
Ja erkennet er sich selben niht,   [7005]
der ie was ein bsewiht.
Der wænt ein biderbe man sîn,
swenner spricht: Deist allez mîn.
Seht alsô hât im sîn guot
gemachet blint sînen muot   [7010]
daz er niht erkennen kan
waz mache ein tugenthafter man.
   Ir seht nu wol tegelîche
daz des armen spotet der rîche;
dem tugenthaftn armen gêt nu vor   [7015]
ein rîche untugenthafter tôr.
Swie rehte dem ze tuon geschiht,
in hât doch gar vür niht
ein trschez vihe.  Wizzet daz
der wuocherære wænt sîn baz   [7020]
dan der niht phenninge hât:
in triuget sîn unwîser rât.
   Der wuocherære ist vil gemeit,
swenn man deheinn gebresten kleit,
wan sô muoz man biten in.   [7025]
Er dunket sich haben grôzen sin
und gedenkt: Ich bin ein biderbe man,
daz ich mîn dinc sô schaffen kan
daz man mich muoz vlêgen sêre:
ich sol noch gewinnen mêre.   [7030]
Trscher wuocherær, du bist
betrogen gar mit dînem list.
Du wænest haben grôzen sin
und ist ein trscheit dîn gewin.
Nu sage, zwiu ist dir dîn guot?   [7035]
Mir ist dermit baz ze muot,
swenn du mirz lîhest.  Dun getarst
sâ niht ezzen des du hâst:
sô getar ich harte wol
dîn guot zern als ich sol.   [7040]
Bsewiht wuocherære,
jâ muostu sîn mîn kamerære.
Mir ist wol mit dînem guote,
sô bistu, bsewiht, mîn huote.
Nu hüete wol bî dînen ougen,   [7045]
daz du weder lût noch tougen
niender rüerest mîn guot.
Ich wilz gar: mir ist ze muot
daz ich mir lâze dâ mit sîn
vil wundernwol, wan ez ist mîn.   [7050]
Du sprichest lîht: Du muost mir
gelten swaz ich lîhe dir
Sô mag ich sprechen wol vür wâr:
ich gilt dirz niht: ich gibe dirz gar
ze behalten, wan du bist   [7055]
mîn kamerære zaller vrist.
Und ob lîhte daz geschiht
daz du sô lange lebest niht
daz ich dirz gebe ze behalten,
sô muoz ich danne selbe walten   [7060]
und phlegen der kamer mîn:
daz lâze ich aver alsô sîn.
Du sprichest: Mag ichz niht geleben,
sô muostuz mînen kinden geben.
Du wellest ez tuon ode niht,   [7065]
wizze ez dir ze tuon geschiht.
Ich gibez in ze behalten ouch,
ob si dir volgent, wârer gouch!
Wan wellent si sîn wuocherære,
si werdent ouch mîn kamerære.   [7070]
Lîht daz si des enwerdent niht
und daz in reht ze tuon geschiht
dâ mit und ich gewunnen hân.
Nu sage mir, nerrischer man,
waz mac dich gehelfen daz?   [7075]
Dir wirt weder wirs noch baz.
Swenn du kumst in der Helle grunt,
dir wære lieber tûsent stunt
daz du nien hetest gewunnen daz
daz dir dâ vüeget Gotes haz.   [7080]
   Swem sîn kint erbarmen wil,
ob er im niht gewinnet vil,
dem solt erbarmen, hiet er sin,
daz er mit sînem bsen gwin 
und mit sîner übeln getât   [7085]
sîns kindes sêle verworht hât.
Der sun der sol gelten daz,
wil er niht haben Gotes haz,
daz sîn vater unrehte gewan.
Nu seht wie der selbe man   [7090]
sich und sîn kint gehandelt hât:
wan ob sîn kint niht enlât
daz sîn vater unrehte gewan,
so ist er ouch verlorn dan.
Man hât dicke durch diu kint nôt   [7095]
beidiu vor und nâch dem tôt.
Dar umbe sprach ein wîse man:
Swer nie kint gewan,
ir sult wizzen gwislîchen,
der ist unsælic sæliclîchen[7100]
[6.3] Die ungeslahten wuocherære
suln gerne disiu mære
vernemen, diu ich hân geseit.
Si mugen dirre mære gemeit
unde harte vrô wesen;   [7105]
si suln ez harte gerne lesen.
Ich hân von in nimêre geseit
niwan daz si hie mit arbeit
in ener werlde gewinnent nôt:
si sint hie und dort tôt.   [7110]
Ein iegelîch untugent tuot
daz selbe: wir sîn hie gemuot
und in ener werlde dermite.
Wir haben wunderlîche site,
daz wir sô harte minnen   [7115]
dâ mit wir hie und dort gewinnen 
nôt und sorgen, kumber, leit:
unmuoze wirbt uns arbeit.
   Mit tugende hât man senfte leben:
diu phlegt uns ouch dar nâch ze geben   [7120]
daz wir dan aver leben baz.
Ir sult mir wol gelouben daz,
swer sich an untugent verlât,
daz er vil grôze müe hât:
swer sich verlât an tugent,   [7125]
der hât an alter und an jugent
senfte leben unde reine.
Nu vernemt wie ich daz meine:
   Swer sich daz an nimt daz er wil
diumüete sîn, der mac niht vil   [7130]
kumbers lîden, wan er vertreit
swaz man im tuot ode seit.
Er hât hie ein senfte leben
daz im ein bezzer sol geben
dar nâch, swenne daz geschiht.   [7135]
Dâ sult ir an zwîveln niht.
   Swer sich bekumbert mit hôchvart,
der hât erwischt ein müelîch vart,
wan swenn im niemen niht entuot,
so gedenket er in sînem muot:   [7140]
Wider den wil ich sô gebârn.
Der ander muoz daz wort gearn
daz er ê vert gesprochen hât:
ich mac des niht haben rât.
Sô gedenket er aver denne:   [7145]
Alsô redet ich etewenne
wider den herrn: ich bin ein man
derz dâ getar und derz dâ kan
In genüegt sîn übermuot
niht den er hât: in dunket guot   [7150]
daz er vor des getân hât
von des übermuotes rât
und dunket sich dâ von wert
daz er hôhverticlîchen vert
hât geredet: von tumpheit   [7155]
kumt solhiu nerrischeit.
Alsô wirvet er mit diser nôt
ein grzer müe nâch sînem tôt.
   Swelich man niht nîdec ist,
dem tuot wol zaller vrist   [7160]
swaz einem andern manne vrumt,
wan im dervon ouch vreude kumt.
Mit dirre vreude wirvet er daz,
daz im in ener werlde baz
êwiclîchen sol geschehen,   [7165]
des mag ich wol vür wâr gejehen.
   Swelich man nîdec ist,
der wirt gemuot zaller vrist.
Swaz guotes einem man geschiht,
dâ hât er von kleine leit niht.   [7170]
Ich wolde daz er möhte sehen
swaz in der werlt guots mac geschehen,
daz er von eim ieglîchem guot
trüege einen swæren muot.
Seht, mit der nôt erwirvet er daz,   [7175]
daz er gewinnet Gotes haz
und hât hie und dort verlorn:
er wære bezzer ungeborn.
   Swelich man ist âne zorn,
der hât ein grôze senfte erkorn   [7180]
diu im zeiner andern zît
eine grzer senfte gît.
Swelich man zornec ist,
der ist unmüezic zaller vrist.
Swenn im niemen niht entuot,   [7185]
so gedenket er in sînem muot,
Sô hât mir der und der getân,
und wirt nimmer zornes ân,
wan er tobet zaller zît
und meldet sîn untugent wît.   [7190]
Sîn varwe unde sîn schal
und sîn vuore meldent über al
daz an im diu untugent lît
diu bse rede gît zaller zît
und diu im zeiner andern stunt   [7195]
gît einn stuol in der Helle grunt.
   Swer wil haben kiusche leben,
dem hât unser herre gegeben
senfte leben unde guot.
Unkiusche liute sint gemuot   [7200]
beidiu an alter und an jugent.
Si ist ein ungeslaht untugent:
unkiusche ist selten âne nît
und ân gebæge und âne strît.
Swenn der unkiusche eraltet ist,   [7205]
so ist im wê zaller vrist,
wan er gedenket durch den tac:
Wol dem jungen der dâ mac
tuon daz diu wîp dunket guot.
Swaz er danne selbe getuot,   [7210]
so ist doch sîn geloube daz,
daz sîner vrowen gevalle baz 
verre ein junger man dan er:
dâ ist er mit gemuot sêr.
Daz selbe tuot ein trschez wîp   [7215]
diu mit unkiusche hât ir lîp
zir alter brâht, diu nîdet daz,
daz ein junc wîp gevellet baz.
Seht, alsô sint si von ir jugent
unz anz alter mit der untugent   [7220]
gemartert, unz an ir tôt,
und koment dan in grzer nôt.
   Swer niemen unreht tuon wil,
der hât dicke gemaches vil
und erwirbt mit senftem leben   [7225]
daz im Got sol geben
ein bezzer leben êweclîchen,
daz geloubet sicherlîchen.
Swer aver gerne unrehte tuot,
der wirt dicke dermit gemuot   [7230]
und erwirvet ouch dâ mit daz,
daz er hât immer Gotes haz.
   Swer sich an trâkeit verlât,
wizzet daz er vil müe hât:
er ist mit allem dem gemuot   [7235]
daz er in der werlde tuot.
Swer aver niht træge ist,
der tuot ez allez zaller vrist
rinclîchen unde wol,
als ein biderbe man sol.   [7240]
Swelich man ze træge ist,
der ist müezic zaller vrist.
Swer zaller vrist müezic lît,
der ist unnütze zaller zît. 
Swer unnütze ist, der ist gar   [7245]
überic, daz geloubt vür wâr.
So ist er ze nihte anders guot
niwan daz man in ûf die gluot
ze Helle, dâ er brinne, tuo:
dâ wermet sich der Tiuvel zuo.   [7250]
Sît er ist ze nihte anders guot,
zwiu ist dan der der übel tuot?
   Swer sich an roup verlâzen wil
und an diuve, der hât vil
kumbers unde arbeit,   [7255]
sorgen, vorhte unde leit,
und erwirbt mit dirre nôt
aver ein wirser nâch dem tôt.
Swer aver des niht entuot,
der wirt von sorgen min gemuot   [7260]
und von vorhten und von leit,
daz wizzet vür die wârheit.
   Swer sich an lüge verlâzen wil,
der hât müe harte vil
mit gedanken, wan swaz er seit,   [7265]
daz muoz sîn alsô gekleit
daz man müge ersehen niht
daz im ze liegen geschiht.
Wizzet daz er muoz arbeiten vil,
der sich dar an verlâzen wil,   [7270]
und gewinnt doch Gotes haz,
ir sult mir wol gelouben daz.
   Swer aver gerne wâr seit,
der sprichet âne arbeit,
wan im sint bereitet gar   [7275]
diu wort, wil er sprechen wâr.
Swer wil ein lügemære machen,
der muoz sorgen unde wachen, 
daz er liege gevuoclîchen,
ode er liuget offenlîchen.   [7280]
Man muoz ein lüge suochen vil,
swer sît mit vuoge sprechen wil.
Swer vinden wil daz niht enist,
der muoz suochen alle vrist.
Die wârheit hât uns Got bereit,   [7285]
daz wirs vinden ân arbeit,
dar umbe was ie sîn gebot
daz deheiner sîn bot
dar ûf niht gedenken solde
waz er vorm rihter sprechen wolde.   [7290]
Wan swer geziuge der wârheit ist,
der ist gemeistert zaller vrist
und weiz wol waz er sprechen sol:
im hilfet Got ze sprechen wol.
Swer geziuge der lüge ist,   [7295]
der muoz gemeistert sîn mit list,
ode er spricht vil lîhte daz
daz er möht verswîgen baz.
   Habt ir der rede war genomen,
sô habt ir daz wol vernomen   [7300]
daz der lebt sanfte zaller vrist,
swelich man tugenthaft ist.
Swer aver untugende hât,
des kumbers mac niht werden rât.
Dâ von sol von der tugent   [7305]
weder an alter noch an jugent
nimmer komen der dâ wil
vreude und sælde haben vil.
[6.4] Wizzet daz ein milte man,
der nâch rehte geben kan,   [7310]
dem nimt man selten, wan er gît
von sînem danke zaller zît. 
Aver swelich man arc ist,
dem nimt man zaller vrist,
wan er gît selten iht,   [7315]
wil manz im nemen niht.
Wie möhte der eim andern geben
der bî rîchtuom hât arm leben?
   Ich hân gehret daz man seit
daz der gouch durch zageheit   [7320]
nimmer ezzen getar
zemâl ein ganzez blat gar:
er vürhtet immer den gebresten.
Swenner sitzet ûf den esten,
sô bîzet er vil sanfte dar,   [7325]
daz er niht slint daz blat gar:
er vürhtet, im gebreste der spîse.
Daz ist der argen liute wîse:
des argen guot, des gouches loup
zergênt beidiu sam ein stoup.   [7330]
Wizzet daz ein bsewiht
getar sîn guot an grîfen niht,
wan swenner sîn bedorfte sêre,
so gedenket er: Ich bedarf sîn mêre
lîht zeiner andern zît od vrist.   [7335]
Alsô lebt er mit dem list,
daz im nimmer sô nôt geschiht,
ern spreche: Ichn bedarf sîn noch niht. [7338]
    Im mag nimmer geschen so we [7338a]
    ern bitte, daz im wirs gescheh. [7338b]
Der arge man der hât die lêre  [7339]
daz er volgt dem gouch ze sêre,   [7340]
wan ir entwederem niht ensol
mit sînem guote wesen wol.
Diu winterzît nimt hin daz loup:
der arge man der geloup 
daz sîn guot werden sol   [7345]
dem derz getar geniezen wol.
Mich müet daz vil wundern sêre
daz iemen volget gouches lêre.
An rehter gâb sol niht verzagen
swer gouches lêr nien wil vertragen.   [7350]
Swer gouches lêre volgen wil,
der hât verzaget al ze vil.
Diu erge kumt von zageheit:
gebrestes vorht macht girescheit.
Dem wirt vil lîhte an gesît   [7355]
der nâch dem guot strebt imme strît,
und sô hât er sich und ouch daz guot
verlorn durch sînen gireschen muot.
Swaz imme strît vrumt zageheit,
daz selbe vrumt diu girescheit.   [7360]
Der mac dâ biderben wol sîn swert
demz guot strîtende niht dunkt wert.
Swer im strît daz guot übersiht,
vil dicke im guot dâ von geschiht,
wan ez im belîbet gar,   [7365]
swenner zerstrt der Vînde schar.
Swer ze vruo suochet daz guot,
der hât verlorn swaz er getuot.
   In dirre werlde strîten sol
swem dort sol geschehen wol.   [7370]
Wir wellenz guot nu vorme strît,
dâ von wirt uns dicke ane gesît.
Swenn wir tuon ihtes unreht,
der Tiuvel uns ân den schilt sleht.
Sô sul wir danne kêren dar   [7375]
der guoten gedanke breite schar 
unde suln daz unreht lâzen,
sô muoz danne der vînt verwâzen
von uns in der Helle gluot.
Alsô sol tuon der rîter guot,   [7380]
er sol mit der tugende van
punieren vrümeclîchen an
des Vîndes untugende schar:
er sol si hurtent brechen gar.
   Nu nemt war, edel rîter guot,   [7385]
wie sich dort machet Übermuot
wider iuch mit ir schar:
ir sult sî undermachen gar.
In ir schar ist Smâcheit,
Gewalt und Unbescheidenheit.   [7390]
Zorn ist ir vaner.  Scharmeister ist
diu Nerrischeit zaller vrist.
Wizzet vur die wârheit,
dâ vert ouch Ruom und Üppikeit.
   Sich umbe, edel rîter guot,   [7395]
und merke waz Girescheit tuot.
Si wâfent sich mit ir gesint.
Wizzet daz dise mit ir sint,
Wuocher, Roup, Diuve, Trügenheit,
Meineit, Lüge, Nît, Lôsheit.   [7400]
   Seht ir niht der Unkiusche schar
diu sich dort hât gewâfent gar?
In ir schar vert Leckerheit,
Vrâz und ouch Trunkenheit.
An ir schar ouch varn muoz   [7405]
unsælic Sælde und bitter Gruoz,
armer Rîchtuom mit Unsinne,
rîch Armuot und valschiu Minne.
Dâ vert ouch in Unstætekeit,
nâch kurzem liebe langez leit.   [7410]
   Diu trâkeit hât ouch ir schar
gewâfent und bereitet gar.
Wizzet daz an ir schar ist
slâf, rensen, geinen, zaller vrist.
Swer niht wil den sic verliesen   [7415]
und den êwegen tôt kiesen,
der sol sich vaste haben derwider
daz in diu untugent nien ziehe nider.
   Swer rîter heizet ode ist,
der sol sich ze dirre vrist   [7420]
ze wer bereiten harte wol.
Ein ieglîch biderbe man sol
beidiu an alter und an jugent
sich wâfen gegen der untugent.
In sol niht dunken ze vil,   [7425]
swer ze Got komen wil,
swie lange er hie strîten sol,
ergêt ez im dar an wol.
Swer dar an gedenken wil
daz er gewinnet vreuden vil   [7430]
und schiuhet grôz müe unde leit,
den sol niht dunken arbeit,
ob er strît mit der untugent
beidiu an alter und an jugent:
wan nie dehein kempfe gewan   [7435]
sô grôze êre sô der man
der die untugent überkomen
mac, daz hân ich wol vernomen.
   Waz hilfet daz, ob ein man
stete unde lant beherten kan,   [7440]
den untugent behertet hât
und der zir gebote stât? 
Swer untugenden an gesît,
der strît einn rîterlîchen strît.
Jâ heize ich daz niht rîterschaft   [7445]
daz ein man bricht einen schaft.
Daz ist rîterschaft gar,
swenn man der untugende schar
ûf die erde bestriuwet nider
und lât sî niht ûf komen wider.   [7450]
   Alsô ich iu vor hân geseit,
der untugende schar ist breit.
Ich hân iu geteilet gar
die untugende in vier schar.
Swer mit den vier scharn strîten sol   [7455]
der bedarf Gotes helfe wol.
Nu tuo war, edel rîter, tuo,
si rîtent allenthalben zuo.
Hôhvart rîtet, daz ist wâr,
ze vorderst an der êrsten schar;   [7460]
Unkiusche treit ein brinnet sper;
Erge ist gewâfent mit unêr;
Trâkeit ist mit bôsheit
vom houbt unz an die vüeze gekleit:
den vieren volget gar ir her.   [7465]
Nu wer dich, edel rîter, wer!
Ir schal sol dich niht schrecken:
du solt dîne tugende wecken,
daz si dich wâfen gegen in.
Den vanen sol dir geben der Sin,   [7470]
daz du dîner tugende her
beleiten künnest wol ze wer.
Daz swert nim du vomme Reht,
daz du daz krumbe machest sleht. 
Den schilt gît dir Bescheidenheit   [7475]
und den halsperc Sicherheit:
wan swelich man bescheiden ist,
der ist ouch sicher zaller vrist.
Geloube setzet ûf daz houbet
den helm dem der dâ reht geloubet.   [7480]
Daz werc ist ân geloube enwiht:
der lîp ânz houbt ist ouch ze niht.
Daz ros Geding dir geben sol,
daz du rîtest âne zwîvel wol
under der untugende schar:   [7485]
si sol dir entwîchen gar.
Die sporn gebe dir Vrümkeit,
wan du solt niht durch zageheit
dîn ros wider ziehen:
du solt den strît nimmer gevliehen.   [7490]
Kiusche sol dir den zoum geben,
du solt dermit rihten dîn leben:
man sol sich enthaben wol
des daz man niht tuon sol.
Den satel gebe dir Stætekeit,   [7495]
wan dich sol weder liep noch leit
neigen weder hin noch her.
Du solt mit der Diumuot sper
an dem êrsten poinder sîn,
daz du dich, rîter, lâzest schîn.   [7500]
   Du solt die Übermüete stechen
abe, sô maht du schier zebrechen
wol der untugende schar:
du solt si überrîten gar.
Du solt mit der Vrümkeit sporn   [7505]
über graben, über dorn 
der Gedinge ros machen springen.
Du solt ez halt des betwingen
daz im berge unde steine
und ouch mos sîn gemeine.   [7510]
   Wirf dîn ros snellîchen
umbe, wan dir muoz entwîchen,
daz wizze, vor und hinder gar
der untugende breitiu schar.
Swar du dîn ros kêren wil   [7515]
mit der Kiusche zoum, dâ müezen vil
untugende vallen, daz ist wâr.
Jâ soltu nider treten gar
Unkiusche unde Trâkeit,
Erge, Nît, Zorn unde Nerrischeit.   [7520]
Ob dir sîn durft geschiht,
du solt des swerts vergezzen niht
daz du enphienge vomme Reht,
und mache dermit die wege sleht
ze beiden sîten unde wît.   [7525]
Der biderbe man sol imme strît
slac über slac ân zal geben.
Swer wil êwiclîchen leben,
der muoz vehten zaller vrist,
alsô hie geschriben ist.   [7530]
   Swer den untugenden hât an gesît,
der hüete sich zer selben zît
daz er nien habe rüemigen muot.
Der vellet wider an übermuot
und wirt aver untugenthaft,   [7535]
swer ruom wil hân, daz er mit kraft
die untugent hât überkomen.
Ich hânz gelesen und vernomen, 
der machet sigelôs gar
der untugende breite schar,   [7540]
swer des âne ruom bestât
daz er si überwunden hât.
Hie sprichet lîhte etlîch man:
Unser vînt uns ziehen kan
unde unser glust zaller stunde   [7545]
ze bsen dingen und ze sunde.
Des vleisches glust geret daz
daz dem lîbe tuot baz.
Uns ziuhet ouch der werlde spot,
wan swer nu wil dienen Got,   [7550]
des spottet man zaller vrist.
Dâ von vil müelîch ist
vehten mit der untugende schar.
Diu driu dinc irrent uns gar.
Swer alsô spricht, dem wil ich geben   [7555]
antwürte: unser leben
ist mit sinne gewâfent wol,
den man derwider haben sol.
Uns suln von der bescheidenheit
werden fünf dinc bereit   [7560]
wider diu driu diu uns den strît
müelîch machent zaller zît.
Bescheidenheit sol uns zehant
bereiten wider den vâlant
rehten gelouben, daz man wol   [7565]
geloube daz man glouben sol.
Swer rehten gelouben hât,
der geloube gît im den rât
daz er Got vürhte und minne.
Sô mag er haben wol die sinne,   [7570]
ob er vürht und minnet Got,
daz er nien vürhte des Tiuvels bot.
Swer Gotes vorht hât und sîn vriuntschaft,
dem mac niht tuon des Tiuvels kraft.
Uns sol ouch von bescheidenheit   [7575]
widern glust werden bereit
vorhte, die man haben sol
hin ze der Helle pitterm hol.
Diu mag uns den glust machen
sûr, well wir gedenken wachen.   [7580]
Gedinge sol ouch werdn beleit
ze Himel von bescheidenheit.
Diu Himelische süeze muoz
vertrîben der gelüste suoz.
Swer an die süeze gedenket iht,   [7585]
in dunket disiu süeze enwiht.
Wider der werlde spot sol
man des Tiuvels spot vürhten wol,
den man ze Helle haben muoz,
swer dâ enphæht des Tiuvels gruoz.   [7590]
Man sol ouch den gedingen hân,
swer ie ze Himel prîs gewan,
dem war der werlde spot niht:
man siht ez wol, swem ez geschiht.
Diu driu dinc werrent im min,   [7595]
swer daz erahten kan mit sin.
[6.5] Wær unser vorvar beliben
mit Got, als wir hân geschriben,
sô wær uns niht des strîtes nôt,
wir hieten leben âne tôt.   [7600]
Swer dar kumt und swer dâ ist,
der ist vor sünde zaller vrist 
hinne vür behüetet wol,
wan er dâ niht strîten sol.
   Diu alt schrift phleget niht ze liegen:   [7605]
der êrste man liez sich triegen,
wan in der vînt betwanc durch nît.
Dô het er niht sô grôzen strît
mit der untugende sô wir hân:
im was unkiusche undertân.   [7610]
Ir sult wizzen vür die wârheit,
im tet niht diu trâkeit.
Sîn gelust liez in gar
mit senfte leben, daz sit wâr.
Im tet ouch niht der werlde spot;   [7615]
den vride het im gegeben Got.
Er möhte die untugende baz
haben überkomen, wizzet daz,
hiet in der vînt niht sô betrogen.
Diu schrift hât uns niht gelogen:   [7620]
dâ von daz im ân grôzen strît
wart von untugenden an gesît,
daz in die untugende überkômen,
als wir dicke hân vernomen,
dâ von müez wir zaller zît   [7625]
mit in haben grôzen strît,
well wir haben Gotes hulde
von der uns des êrsten mannes schulde
brâhte von sîn selbes muot:
dem kind schât daz der vater tuot.   [7630]
   Der vîent wart von Got vertriben
durch untugent, daz ist geschriben.
Dô wart ouch der êrste man
durch untugent vertriben dan. 
Dâ von sol niemen sprechen daz,   [7635]
daz Got hiet getân baz,
ob ez sîn will wær daz er wolde
daz man âne müe dar komen solde.
Dar zuo habe wir von unser schulde
getân wider Gotes hulde,   [7640]
daz uns ist vehten mit untugent
müelîch an alter und an jugent.
Wie mac der vrîlîchen leben
der sich dem Vînde hât gegeben?
Wan der vîent eigen ist   [7645]
der untugent zaller vrist.
Swelich man hât grôze sunde,
der strîtet müelîch zaller stunde. [7648]
    Er machet sich gar ane wer [7648a]
    der lange ist in seiner gewer.
    Swer dem valant ist undertan,
    der mach die untugent niht verlan.
    Swer mit untungend striten well,
    der hebe sich von im snelle. [7648f]
Sît der vîent wart vertriben, [7649]
alsô wir vinden geschriben,   [7650]
durch sîn übel und Gotes geriht,
sô sol unbillîch dunken niht,
ob uns güete dar bringen sol
unde Gotes genâde wol.
Wider des Vîndes übel ist   [7655]
unser guot zaller vrist.
Dâ wider ist gegen Gotes geriht
diu gnâde diu uns geschiht
von sîner gotlîchen güet,
wan wir werden min gemüet   [7660]
dan uns verdienent unser sunde
die wir begên zaller stunde.
Wær Gotes gnâde und unser guot
niht, der vîent spræch Man tuot
mir unreht: sus mac er niht   [7665]
gesprechen, wan er ist durch geriht 
und durch sîn übel komen dan.
Sô ist gestigen dar der man
von Gotes gnâde, wan Got tuot
daz ein man hât guoten muot.   [7670]
Wære niht Gotes geriht,
den Tiuvel hiet ze Helle niht
sîn übel brâht, daz ist wâr:
durch si beide muose er dar.
Ich mac ouch vür wâr gejehen,   [7675]
ân Gotes gnâde mac niht geschehen
daz iemen kom ze sînem rîche,
wan sîn rîche ist ungelîche
rîcher dan unser guot getât,
daz weiz wol swer iht sinne hât.   [7680]
Diu Himelisch natûre ist,
als wir sehen ze dirre vrist,
von Gotes geriht und durch übermuot,
swer sîn rehte war tuot,
hin ze Helle gevallen nider:   [7685]
sô sol erstîgen ûf dâ wider
diu irdische natûr durch guot
von Gotes gnâde und durch diumuot.
Der Tiuvel bsert daz im gab
Got, dâ von viel er her ab:   [7690]
swer bezzert daz im Got gît,
er gît im mêre zeiner andern zît.
   Swer in Gotes gnâde niene ist,
der ist übel gar die vrist.
Wær der vîent drinne beliben,   [7695]
er wær ouch noch dort, deist geschriben.
Sît man ze Got komen sol
durch die rehten güete wol 
und sît niemen mac hân guot,
ern sî mit dem strîte gemuot   [7700]
den man mit untugenden hât,
sô seht ir wol, sîn ist niht rât,
wirn müezen alle mit untugent
vehten an alter und an jugent.
   Dem êrsten manne wart gegeben   [7705]
daz er möhte ân sîn müe leben
êwiclîchen, ob er wolde
sich bewarn als er solde:
im wart verlâzen zuo der stunde
diu maht daz er möht tuon sunde.   [7710]
Dâ wider gab uns Got vür wâr
daz wir mit müe suln dar,
und daz wir mugen sünden niht,
swenn uns ze komen dar geschiht.
Hie sol ergên unser strît,   [7715]
wan man uns dort lôn gît:
wir mugen niht gescheiden dan,
als dâ tet der êrste man.
Dâ von sule wir grzern strît
danne er haben zaller zît.   [7720]
Sît untugent brâhte dan
mit des Vîndes rât den êrsten man,
sô muge wir daz verstên wol
daz man vaste strîten sol
mit in beiden, swer wil dar   [7725]
komen, daz geloubt vür wâr.
Ez enist niht wunder, sît
der vâlant het ze Gote nît,
daz er uns wil ziehen dan
danne er zôch den êrsten man   [7730]
und danne er selbe ist vertriben,
als wir vinden geschriben.
Nu merket an uns grôz nerrischeit:
tæt uns ein man ein kleine leit,
wir vlizzen uns immer dar an   [7735]
daz wirz gulten dem selben man
mit grzerm ode mit glîchem leit,
und haben dar an trâkeit
daz wir uns erwern niht
daz uns der vil bse wiht   [7740]
nider ze Helle ziehen wil,
dâ man vindet leides vil
und dâ man immer âne buoz
mit nôt lebende sterben muoz.
Ich hân gelesen und vernomen,   [7745]
swer den vâlant wil überkomen,
der sol mit allen liuten wol
leben, als er leben sol.
Er sol niht krenken sîne kraft
mit deheiner andern vîentschaft.   [7750]
Swer im einem hât an gesît,
der hât verendet allen strît.
Ich rât eim ieglîchn rîter wert,
die wîl des Tiuvels strît wert,
daz er niht anders tuon sol,   [7755]
wan sô mag er gestrîten wol.
Swer mit eim pern strîten solde,
ich wæne niht daz er wolde
phenninge zelen zuo der zît,
wan im würde vil lîht an gesît.   [7760]
    Der Tiuvel fuget alle vrist, [7760a]
    daz der man unmuzzich ist
    mit zorn, mit urliuge und mit haz,
    mit girde, mit wucher, daz er baz
    im zu chome ze der vrist,
    swenne er ungewarnet ist. [7760f]
Swenn wir solden vehten baz, [7761]
sô irret uns vil dicke daz 
guot: sô ist der vîent vrô,
swenner uns dan triuget sô.
Der vihtet niht nâch rîters reht   [7765]
der den armen man sleht,
und der im nimt sîn guot,
der treit unrîterlîchen muot.
Gedenket, rîtr, an iuwern orden:
zwiu sît ir ze rîter worden?   [7770]
Durch slâfen, weiz Got ir ensît.
Dâ von daz ein man gerne lît,
sol er dar umbe rîter wesen?
Ichn hânz gehret noch gelesen.
Wænet dar umbe ir rîter sîn,   [7775]
durch guote spîse und guoten wîn?
Dar an sît ir betrogen gar:
jâ izzet daz vihe gern, deist wâr.
Durch kleider und durch schne gesmît
sît ir niht rîter: swerz gît   [7780]
eime gebûren, er wirftz niht hin.
Jâ hât der gouch wol den sin,
ob man im ein schellen bint zem vuoz,
daz er si hin tragen muoz.
   Swer wil rîters ambet phlegen,   [7785]
der muoz mêre arbeit legen
an sîne vuor dan ezzen wol:
mêr ze tuon er haben sol
danne tragen schne gewant
und varen swingent sîne hant.   [7790]
Der mac niht rîters ambet phlegen,
der niht enwil wan samfte leben.
Swelich man müezec ist,
der ist unmüezec zaller vrist, 
wan er gedenket lîhte daz,   [7795]
daz im wær ze houwen baz.
   Dehein man sol müezec sîn:
swer müezec ist, der machet schîn
daz muoze dicke unmuoze bringet,
swenner mit ungedanken ringet.   [7800]
   Wil ein rîter phlegen wol
des er von rehte phlegen sol,
sô sol er tac unde naht
arbeiten nâch sîner maht
durch kirchen und durch arme liute.   [7805]
Der rîter ist vil lützel hiute
die daz tuon: wizzet daz,
swerz niht entuot, ez wære baz
daz er ein gebûre wære,
er wære Got niht sô unmære.   [7810]
Ir sult daz vür wâr wizzen,
im wirt sîn rîterschaft verwizzen,
swer sîn rîterschaft sô hât
daz er nien gît helfe unde rât.
Er wirt dar umbe ouch gemuot,   [7815]
der dem man unrehte tuot.
Dâ bî muget ir wizzen wol
waz ouch dem geschehen sol
der selbe unrehte tuot:
ich wæn er wirt noch mêr gemuot.   [7820]
   Daz selbe ich von den phaffen wil
sprechen: er hât harte vil
ze tuon, wil er âne schant
nâch reht begên sîn ampt.
Er hât ouch ze tuon mêre   [7825]
dan singen ode schrîen sêre.
Er sol guotiu bilde geben
mit kiuschem lîp, mit reinem leben, 
mit guotem werc, mit rede schône:
er sol an tugenden tragen krône.   [7830]
   Dar nâch stêt ouch dem rîter wol
daz er lebe als er sol,
mit sînem wîbe güetlîchen,
mit sînem volke heimlîchen.
Des soltu, rîter, volgen mir,   [7835]
swie du wil daz dîn herr mit dir
lebe, alsô lebe du und der man
der ouch dir ist undertân.
Noch wil ich geben einen rât,
swelch man einen herren hât,   [7840]
daz er gerne tuo swaz
er gebiutet: wizzet daz,
daz er minnert sîne eigenschaft.
Sîn guoter wille gît im kraft
daz sînes kumbers minner ist,   [7845]
tuot erz gerne zaller vrist.
   Swer mit vreude tuot durch den tac
des er niht über werden mac,
mich dunket er habe guoten sin:
in betrâgt ouch dester min.   [7850]
Der man hât einen vrîen muot
der gerne tuot daz er tuot.
Sô wizzet daz der ein schalc ist
der ungerne tuot zaller vrist
swaz er in der werlde tuot:   [7855]
sîn lîp ist eigen und sîn muot.
   Ob dich dîn herre schendet sêre,
daz ist dir niht sô grôz unêre
sô, daz du zaller vrist
mit dem dinge unmüezec bist   [7860]
daz du dir einn vrîen man
wil machen undertân, 
alsô er ein vihe wære:
swerz tuot, der ist Got unmære.
   Jâ sol man sînen eigenkneht   [7865]
lâzen leben nâch mannes reht.
Man sol an im Got êrn,
man sol von im des dienstes gern,
daz man an die menscheit
gedenke, diu hôhe ist beleit.   [7870]
Wil du vertreten mit dem vuoz
den der lîht hôher sitzen muoz
denne du in unsers herren rîche,
daz enstêt niht rîterlîche.
   Ein man ist niht eigen gar,   [7875]
daz sol man wizzen wol vür wâr.
Swer sîn wænt, hât niht vernomen
daz daz beste teil ist ûz genomen:
wan die sêle und den gedanc
nie dehein man bedwanc.   [7880]
Dâ von sô gebiut nimêre
dan du wellest daz dîn herre
gebiete dir: wan hâstu reht
ze gebieten dînem kneht,
daz selbe reht hât an dir   [7885]
dîn herre, dâ von sô volge mir.
   Du sprichest lîht Ich hân herren niht:
sô wizze daz ez vil lîhte geschiht
daz dun gewinnst.  Du sprichst zehant
Ich bin ein herre in mînem lant:   [7890]
sô mag ich sprechen wol vür wâr,
dune gestîgest nimmer dar,
dich enmüge ein lîhter man
dar nâch haben undertân. 
Ân herren ist weder grôz noch kleine;   [7895]
einen herrn hab wir gemeine,
daz ist unser herre Got.
Man sol wol vürhten sîn gebot.
Wir haben von im sêl unde lîp,
liute, eigen, guot, kint unde wîp,   [7900]
und gebiutet uns nihtes niht
niwan daz uns mit êrn ze tuon geschiht.
Got gebiut uns tuon rehte:
sô gebiutich mînem knehte
Tuo dem unde dem gewalt.   [7905]
Got gebiut uns manicvalt
tugent, hüfscheit unde guot:
sô sprech wir zunsern liuten Tuot
swaz ir welt; ich gestên
iu wol bî, swie ir welt gên.   [7910]
Swâ ein mehtic rîter ist,
die übeln girege mit dem list
ziuhet er in sîn eigenschaft.
Der eigen von sîns herren kraft
tuot vil dicke daz er tuot.   [7915]
Dâ von unser herre muot
der sünden von dem herren mêre:
ez muoz si bêde müen sêre.
   Ez ist dar zuo komen hiute,
wir schermen unser eigenliute   [7920]
daz si ân Kristenlîch dinc lebent,
umbe geistlîch meister si niht gebent.
Swaz dem kneht ze tuon geschiht,
ez sî guot ode niht,
ez ist dem herren selten leit.   [7925]
Er erwirvet halt mit arbeit 
daz er im behabe sîn sunde
und sînen willen zaller stunde,
und als ich gesprochen hân,
wolt er gern des abe gân   [7930]
daz er niht entæt unrehte,
er wær ze nihte zeinem knehte.
   Jâ mag ich noch sagen sô vil,
swer sînen kneht niht dwingen wil
daz er tuo reht unde wol,   [7935]
daz er vor Got stên sol
und muoz im von sînem knehte
antwürten gar nâch rehte.
Hêly was, alsô wir lesen,
ein vil guot man gewesen   [7940]
und enkalt sîner kinde sunde,
daz er inz niht werte zaller stunde.
   Swelich man selbe guot ist,
der sol sich vlîzen zaller vrist
daz die die im sint undertân   [7945]
tuon daz rehte sî getân.
Swer aver des niht tuon wil,
der hât Got zantwürten vil.
Dâ bî muget ir wizzen wol
waz dem manne geschehen sol   [7950]
der sîn liute zaller stunde
wil beleiten an die sunde:
man schamt sich der sünde niht.
Swes sich der herr schamt, daz geschiht
zehant ze tuon dem knehte,   [7955]
daz welle wir haben ze rehte.
Wir machen unser liut roubære,
diebe unde wuocherære. 
Wir wellen teilen daz guot
und haben doch sô trschen muot   [7960]
daz wir wellen âne meil
der sünde sîn und âne teil
der schande.  Des enmac niht
gesîn: wan swaz geschiht
durch uns ze tuon deheime kneht,   [7965]
daz übel sî und wider reht
unde wider Gotes hulde,
dâ hab wir teil an der schulde.
Wir haben halt vil gar die sunde,
wan man verswîgt vil oft die hunde,   [7970]
swenn man dem jeger gît den prîs
daz er sî an jagen wîs.
Man sprichet: Den hasen vienc der man,
sô hât ez lîhte der hunt getân.
Alsô wirt uns gar diu sunde,   [7975]
wan wir gebietenz zaller stunde;
si wirt sô ouch gar dem knehte,
der uns volget am unrehte.
   Heize ich slahen einen man
den der mir ist undertân,   [7980]
wir haben bêde sünde gar.
Du sprichest lîhte Ine getar
niht lâzen mînes herrn gebot:
sô sprichich: du solt vürhten Got
harter; er ist dîns herren herre,   [7985]
dâ von soltu in vürhten mêre.
Dîn herre mac dir geschaden wol:
ein ieglîch man doch vürhten sol
Got mêre danne deheinen man,
der sêle und lîp dar senden kan   [7990]
da unruowe nimmer ende hât.
Dâ von sô habe mînen rât
und leiste dînes herrn gebot,
swenn ez niht ist wider Got.
   Ich gibe ouch den herren rât   [7995]
daz ieglîcher der sinne hât
nimmer daz gebieten sol,
man mügez mit rehte tuon wol.
Swer wil gebieten wider Got,
ir sult wizzen daz sîn gebot   [8000]
verliust niht den gebieter eine:
die leister sint verlorn gemeine.
   Daz selbe sprich ich daz man sol
an vriuntschaft behalten wol,
daz einer zem andern nihtes ger   [8005]
wider Got und wider êr.
Man sol haben ouch den sin,
ist iemen unde bit ers in,
daz erz im gar versagen sol,
sô dient er sînem vriunde wol.   [8010]
Anders uns ze tuon geschiht:
swenn unser vriunt uns bitet niht,
sô biete wir uns selbe dar
und sprechen Du möhtest enem gar
an gewinnen sîn guot.   [8015]
Jâ hâstu niht eins rîters muot,
und reizen sô an bsen dingen
unser vriunt die wir betwingen
ze reht durch vriuntlîch reht solden,
ob si niht rehte tuon wolden.   [8020]
   Wir sprechen Dort ist ein wîp,
diu hât gar einn stolzen lîp. 
Wil du daz ich dirs gewinne?
Si ist ein spiegel gar der minne.
Und sprichet er dann Ich wil sîn niht,   [8025]
sô spreche wir Ginc, bsewiht!
Du bist deheiner êren wert,
wan dîn muot des niht engert.
Wê dem manne der volgen wil
dem bsen râtgeben vil:   [8030]
dem râtgeben wirt niht baz,
ir sult mir wol gelouben daz.
[6.6] Den herren ist vil ofte liep
ir êren und ir sêle diep.
Der bse râtgebe mit bsem rât   [8035]
sîns herren sêl vil dicke verrât
und gît durch lützel, daz ist wâr,
sînes herren êre gar.
Daz man sich behüet, diest müelîch,
vor dem diebe heimelîch,   [8040]
doch sol der herre haben die sinne
daz er daz wizze, und wirt ers inne
daz er im rætet wider Got,
daz der râtgebe ist stiuvels pot:
den boten hât der vâlant   [8045]
nâch dem herren ûz gesant.
Der biderbe herre sol den kneht
enphâhen nâch sîns herren reht:
er sol sprechen zuo im Strîche
von mir in dînes herren rîche,   [8050]
wan ich wil dir dar volgen niht,
du wârer werlde bsewiht!
   Der râtgebe rætet niht nâch êre
der sînem herren gît die lêre 
daz er kêre sînen vrîen muot   [8055]
an erge unde wier daz guot
den liuten müge abe gebrechen.
Er ensol sich niht sô swechen
daz er volge solhem rât,
der niht wan girescheit hât.   [8060]
Swâ er mac mit rehte nemen,
dâ neme; ez mac uns niht gezemen
swaz wir nemen mit unrehte
ouch unserm eigenknehte.
   Man solt ûs rîchtuom ahten klein,   [8065]
wan er ist stiuvels wetzestein,
sîn netze und sîn vederspil.
Er væhet dermit gevügeles vil,
die ze Himel vliegen solden,
ob si ze Hell niht vallen wolden.   [8070]
Guot, du wetzest uns mit list,
daz wir snîden zaller vrist
mit kündekeit nâch dir, guot:
du gîst uns vil listigen muot.
Swer wetzet sîn mezzer, wizzet daz,   [8075]
daz er snîdt ein wîle baz
unz im diu snîde vellet gar.
Alsô sage ich iu vür wâr,
swer sich verlæzet an gewin,
der wetzet sô harte sînen sin   [8080]
mit girescheit nâch dem guote
daz im diu snîde an sînem muote
wirt abe gesliffen sêre.
Sone mag er dan nimêre
an êre gedenken noch an Got:   [8085]
er möht im selben sîn ze spot. 
Ze jungest wetzet er sînen sin
sô daz ern gar verslîfet hin,
und kan niht dwingen sînen muot,
ern sterbe bî sîm eigenguot   [8090]
des hungers und des vrostes ouch.
Ist er dan niht ein wîser gouch,
daz er sînen sin so verleit
daz er hie mit arbeit
erwirvet daz im dort werde   [8095]
aver wirs in ener werlde?
Wan als ich sprach, swer an gewin
hât verlâzen sînen sin,
der hât hie und dort nôt
unde ist lebendiger tôt:   [8100]
und dunket sich doch der samenære
wîse und der wuocherære!
Geselle, du hâst einn armen sin
den du wænest kêren an gewin:
nu sage mir, wâ sint dîne list?   [8105]
Ez schînet wol daz verslizzen ist
dînes sinnes snîde gar,
wan dîn gewin kumt dar
da er verlust wol heizen mac,
daz sehe wir wol durch den tac.   [8110]
Swenn du dich rüemest von gewinne,
sô soldest du haben ouch die sinne
daz du erkantest dîn verlust,
sô liezest du dîns ruomes glust:
wan du hâst dîne milte verlorn,   [8115]
die erge hâstu dir erkorn,
die tugent umb untugent gegeben,
und wænest nâch gewinne streben. 
    Ôwê, armer samenære,
du bist ein trscher wehselære:   [8120]
du bist gewinnunge holt
und gîst doch umbe kupher golt.
Swenne du nimest dem sîn guot,
so erschreckest du in dînem muot
die tugende, daz si varent hin,   [8125]
sô hâst du danne bsen gwin.
   Wil du schiere werden rîche,
sô lâz dir sîn gar gelîche
beidiu rîchtuom unde armuot,
sô bistu rîch in dînem muot.   [8130]
Ein arm man der mac lâzen verre
mêre ruowent dan ein herre
immer vehtent müge gewinnen,
und vlîzet er sich mit allen sinnen.
Der hât genuoc der nie mêr wil:   [8135]
der rîche gewinnt nimmer ze vil,
wan die natûre hât daz guot
daz ez machet gireschen muot.
Mit dem guote wehset girescheit,
erge, vorht, sorge, müe, leit.   [8140]
Der ist wol ein trscher man
der daz niht verstên kan.
Ich weiz wol daz der wuocherære
noch dehein samenære
nimmer daz ze verstên gert,   [8145]
wan er dunket sich nimêre wert
niwan sô vil sô er hât:
daz ist der girescheite rât.
Diu ist ein armiu werdekeit
an der uns ein diep scheit.   [8150]
   Swaz werdekeit von tugent kumt,
diu wert mêre unde vrumt
baz dan diu diu vomme guot
kumt in einen bsen muot,
wan si wert lange vrist.   [8155]
Dehein diep hât sô vil list
daz er sîn iht müge steln,
dâ von sul wir sî weln.
   Du sprichest lîhte Dîn lêre
diu müet mich harte sêre,   [8160]
wan dem der niht enhât,
dem ist ze swære dîn rât.
Ich mac âne guot niht leben,
dâ von muoz ich nâch guote streben,
wan ich bin ein man   [8165]
der niht hantwerkes kan.
Ich muoz gewinnen swie ich mac,
wan ich möht niht einen tac
âne guot wol geleben,
dâ von solt du mirz vergeben.   [8170]
   Sô wirf dernâch ân girescheit,
habe sin vür kündekeit,
wis niht an pentekeit müelîch,
wis hüfsch unde vertregelîch.
Tuo niemen leit mit dînem sagen,   [8175]
verswîc daz man sol verdagen.
Swâ du kumst einem herren zuo,
dem diene gerne unde tuo
daz du sîst allen liutn bereit.
Mit sô getâner pentekeit   [8180]
sol sich begên der arme man
der niht hantwerkes kan. 
   Man dient den herrn mit grzer êr
dan der bôsheit, wan swer
sînen sin an guot verlât,   [8185]
die Bôsheit er ze vrouwen hât,
der Erge er immer dienen muoz
und ligen ouch under ir vuoz.
   Jâ sol ein man niht verzagen,
daz getar ich wol gesagen,   [8190]
daz in Got lâze verderben.
Ein man mac guot und êre erwerben,
ist er guot und tugenthaft,
wan Got gît im hie die kraft
daz er wert an guoten dingen:   [8195]
jâ mag im nimmer misselingen.
Got vil wol gevüegen kan
daz ein tugenthafter man
gewinnet êre unde guot.
Dar zuo hât er einen muot   [8200]
daz er am kleinen und am grôzen
sich dem rîchen mac genôzen.
Der ist ein tugenthafter man
der alsô wol mit blîe kan
sô mit golde: deist der eine   [8205]
dem beidiu grôz unde kleine
gelîchez herze geben mac.
Der hât wol der tugende tac
von der untugende naht gescheit.
Swem ez sî liep ode leit,   [8210]
er mac gestrûchen niht ze hart,
wan er hât lieht zuo der vart.
Ich hân der harte vil gesehen,
swenne in ist schade geschehen 
amme lîbe od amme guot,   [8215]
daz si habent sô trschen muot
daz si wænent daz ir niht
Got geruoche: daz geschiht
in ze grôzer unsælikeit.
Mügen si gedenken waz arbeit   [8220]
die heiligen liten und welhe nôt
und waz martr und welhen tôt
und waz armuot und welhe schant!
Dâ bî mac man verstên zehant
daz unsælde grôziu sælde ist   [8225]
swer si mit guot enphæhet zaller vrist.
Jâ wolt ouch unser herre Got
dulten armuot unde spot,
durst, hunger, vrost und ander nôt;
der wolt ze jungest ligen tôt   [8230]
der uns allen gît daz leben.
Swem er rîchtuom niht wil geben
und læt in leben armeclîchen,
als er tet selbe, gewislîchen,
er möht sîn harte vrô wesen,   [8235]
wil er gelouben daz wir lesen.
Swen er handelt alse sich,
zürnet der, des wundert mich.
Swer hie mit im lîdet gern die nôt,
der lebt mit im wol nâch dem tôt.   [8240]
   Nu wil ich râtn den herren allen
daz siz lieht nien lâzen vallen,
wan si suln uns liuhten vor,
unz si uns bringent vür daz tor
dâ immer ist der sunne schîn:   [8245]
si mugen gern dâ inne sîn. 
Swes lieht aver erloschen ist,
der zünde ez in kurzer vrist
und habe ez ûf vil wundernhô,
wan sô siht er und wir alsô   [8250]
baz, und tuot er des niht schier,
sô vellet er und valle wir.
Von rehte viel der in die gruob
der sîn lieht niht ûf enhuob:
von reht der in dem graben lît   [8255]
der nahtes rîtet zaller zît.
   Diu vinster ist den vînden liep.
Bî vinsterr naht stilt der diep.
Bî der naht tuot man vil
des man tages niht tuon wil.   [8260]
Swaz man nahtes tuon mac,
daz meldet gar der liehte tac.
Vil dicke man der naht schant
bî dem tage wol bevant.
   Alsô sage ich iu vür wâr,   [8265]
der jungest tac der meldet gar
swaz man nu getuon mac.
Er wirt ein schemelîcher tac,
wan die sünde die man hât
und die man âne bîhte lât,   [8270]
die werdent dan gar ûf getân.
Sô möht man lîhter wizzen lân
und mit minner schant sîn sunde
einem man ze dirre stunde.
   Man sol haben vor den ougen   [8275]
offenlîchen unde tougen
driu dinc, swer wil bîhte hân,
daz dunket mich wol getân: 
vorht, gedinge unde minne.
Wan swer wil bîhte tuon mit sinne,   [8280]
der sol gedinge hân ze Got,
vorht unde minn durch sîn gebot.
Der guote geloube gît
uns diu driu dinc zaller zît.
Geloube wir die grôzen nôt   [8285]
und daz er durch uns leit den tôt,
daz mac uns geben grôze minne,
ob wir dar kêren unser sinne.
Geloube wir daz er zebrach
die Helle und erstuont dar nâch,   [8290]
daz mac uns wol gedinge geben
daz er uns gît vrlîch leben.
Ob wir gelouben daz wir hân vernomen
daz er zem geriht sol komen,
wizzet daz uns daz zaller zît   [8295]
grôze vorht hin zim gît.
Sîn güete und sîn diumuot
gît minne, swer sîn war tuot.
Daz er genædic unde mehtic ist,
daz gît uns gedinge zaller vrist.   [8300]
Sîn reht unde sîn geriht
læt uns âne vorhte niht.
Uns gît sîn menscheit
minne, unde sîn Gotheit
gedinge, unde sîn geriht   [8305]
vorht, ob man geloubt der schrift.
Wir suln uns lâzen unser sunde
riuwen und leit sîn zaller stunde
durch vorht, gedinge, minne,
swer wil haben guote sinne.   [8310]
Swer nien wil büezen sîne sunt
die wîle und er ist gesunt, 
der minnet Got niht, der ân nôt
durch uns wolde ligen tôt.
Swer aver minnet Got niht,   [8315]
sîn geloube ist enwiht,
wan er mac den glouben niht hân
daz Got habe durch uns vil getân.
Minne kumt, als ich hân geseit,
vome gelouben.  Swer sîn menscheit   [8320]
geloubet unde sîn diumuot,
ern mac niht haben den muot,
ern müeze im holt sîn.
Ist er im holt, daz wizzt dâ bî,
daz er im dient die wîle er mac   [8325]
und bîtet niht sînn jungisten tac.
Swer Got niht dienen wil,
der minnet in niht vil.
Swer in niht minnet, als ich hân geseit,
der geloubet niht sîn menscheit.   [8330]
Hât er sînen glouben niht wol,
sô wizzt ir wol waz sîn werden sol.
Swer ze sînem jungsten tage lât,
daz er sîn sünde niht gebüezet hât,
er muoz durch vorht die bîhte hân   [8335]
dier durch minn solt hân getân.
Swer dienet Got durch vorhte und minne,
der hât tugende unde sinne
unde ist gar Gotes kint.
Sô wizzet daz die schalke sint,   [8340]
swer tuot sîne bîhte niht
niwan swenn er den tôt siht.
Doch wil ich daz râten wol
daz man sîn bîhte tuon sol 
an sînem jungisten zît,   [8345]
swer in sînen sündn sô lange lît:
wan swierz niwan durch vorhte tuot,
sô ist doch Got wol sô guot
daz er im lîhte gît die sinne
daz erz ouch tuot durch minne;   [8350]
tuot erz, sô hân ich wol gedinge
daz in Got ze gnâden bringe.
Doch wil ich iuch hie wizzen lân.
Swaz er hie übels hât getân,
des muoz er enphâhen buoz   [8355]
ê er dar in setze den vuoz.
Dâ von ist ein grôzer sin
daz man durch vorhte und durch minn
mit bîhte hie büeze sîne sunt,
wan uns wirt dort wirs tûsent stunt,   [8360]
und vert dannoch genædeclîche,
ob uns wirt Gotes rîche,
habe wir bîhte ân buoze genomen,
als ir habt hie vernomen.
Doch muge wir vervælen daz   [8365]
wirs niht nemen.  Dâ von ist baz
daz wirs nemen zuo der stunt,
swenne wir sîn wol gesunt,
wan wir enwizzn wie nâhe uns ist
bereit der tôt zaller vrist.   [8370]
Etlîcher wænet, swaz er tuot,
daz imz vergebe diu Gotes guot
unde Gotes gnâde gar:
er triuget sich, daz ist wâr,
und ist durch den gelouben vlorn.   [8375]
Solt daz Got niht wesen zorn 
daz er im nimt sîn geriht?
Er tuot wider reht niht
gnâde, wan diu gnâde ist
gemischet mit rehte zaller vrist.   [8380]
Sô ist ouch sîn geriht
deheine wîs ân gnâde niht.
Man sol vorhte und gedinge hân
ze Got, daz ist wol getân.
Swer unsern herren vürhtet niht,   [8385]
der geloubt niht sîn geriht.
Swer hin zim niht gedinge hât,
der geloubt niht sîn genâd.
Swer wil rehte bîhte hân,
den riuwe swaz er hât getân   [8390]
ze übelen dingen und ze sunde
und sage ez zuo der selben stunde
sînem phaffen unde tuo daz
daz er in heize: Gotes haz
wirt zehant von im genomen,   [8395]
ich hânz gelesen und vernomen.
Er muoz sîne sünde gar
einem sagen, daz ist wâr:
sîn bîhte er niht teilen sol,
wan in sol einer erkennen wol.   [8400]
Ein man spricht lîht Ich schame mich:
er möht ave harter schamen sich,
swenner tuot sô bslîchen gar
daz erz einem sagen niht getar.
Doch sol uns daz wesen suoze   [8405]
daz uns diu schame hilft ze buoze.
Dar nâch und man gedenkend ist
sol man sagen zuo der vrist
waz man begie, wâ, wenne und wî 
und durch wiu, daz der phaffe derbî   [8410]
müge wizzen ob sîn sunde
sî kleine ode grôz zer stunde.
Sô mag er dan wol geben rât:
anders man niht vervangen hât.
   Niemen nahtes stelen wolde,   [8415]
trout er daz man in hâhen solde
des tages: wir tæten übel niht,
wesse wir waz uns geschiht
und waz uns geschehen sol,
swenne dem guoten geschiht wol.   [8420]
Daz wir aver gelouben niht
unsers herren geriht,
dâ tuo wir an vil unreht
unde bsern dâ mit unser reht.
Ob unser gloube wære baz   [8425]
nâch Got und êren, wizzet daz,
daz ez uns liep möhte wesen.
Wie sule wir alsô genesen
od wie solz stên umb unser leben,
wan die uns solden geben   [8430]
erzenî, die sint ersieht.
Die uns solden tragen daz lieht
vor, die gênt gerne bî der vinster.
Diu zeswe hant ist worden winster.
Diu lember sint ze wolven worden.   [8435]
Unser deheinr behalt sînn orden:
der phaffe bewîst niht als er sol,
der leie volget niht ze wol.
Einr ist unwîse, der ander tôr:
einr vellet hindn, der ander vor.   [8440]
Niemen ir deheinen hebet:
ein ieglîcher ze valle strebet.
   Die phaffen îlent hin zer Helle;
die leien die sint alsô snelle 
unde wellent dringen vür:   [8445]
ez ist grôz gedranc zer tür.
Si varnt dâ hin âne geleit;
si macheten minner tageweit,
und wessen si waz wær dar inne.
   War sint komen unser sinne,   [8450]
daz wir niht kunnen verstên
daz ein ieglîcher muoz gên
dar dar er verdienet hât?
Des mac niht sîn dehein rât:
wan sô wære Gotes geriht,   [8455]
ob er niht rihten wolt, ze niht.
Ob unser herr niht rihten wolde,
sagt mir zwiu sîn gerihte solde?
Jâ wil er daz wir rihten wol,
dâ von niemen gelouben sol   [8460]
daz er lâze sîn geriht.
Swer aver daz geloubet niht,
daz unser herre tuon sol
dem übelen wê, dem guoten wol,
wizzet daz der geloubet niht   [8465]
weder Gotes gnâd noch Gotes geriht.
Dâ von sô muoz er sîn verlorn
und wær noch bezzer ungeborn.
    Daz sehste teil ist ûz getiht:
daz sibende sol ich lâzen niht.   [8470]