Rhetorica novissima 6
Table of Contents -- Book 5-- Book 7-- Tituli 
Incipits -- Siglorum conspectus

INCIPIT LIBER SEXTUS. 

6.1 De principiis conventatorum. 

6.1.1 Exordium generale pro magistris qui suos discipulos sibi successores instituunt in docendo.

     Salomon, sapientum omnium sapientissimus, inter cetera sic locutus est: Omnia renovantur et deiciuntur; sic generatio carnis et sanguinis nascitur et finitur. Cum igitur queque singula tendant ad finem et generatio transeat deficientie ordine primitivo, necesse est ut per successivam propagationem in diversis naturis et officiis generatio subsequatur: alioquin humana conditio et unversa scientiarum genera deperirent. Ergo patres vi nature atque consuetudinis approbate sibi legitimos filios vel alios heredes instituunt principales. Unde per locum a simili, magistri scholares quos per doctrinam et scientiam genuerunt sibi debent heredes instituere, ut patres et magistri efficiantur ordine successivo. Ego vero, sicut bos qui flexis poplitibus requiescere concupiscit, nolo intendere de cetere magisterio vel doctrine; unde magistrum .B. fratrem et socium nostrum et in hac facultate satis instructum mihi heredem instituo et principalissimum successorem, deprecans ut sub eius debeatis ferula militare. 

6.1.2 Narratio doctrinalis.

     Possunt magistri, si volunt, suos discipulos amplius commendare, et proponere auditoribus alias causas pro quibus regere non velint vel non possint. Amplius, tam magistri quam cathedram ascensuri, debent in ordine sermocinandi uti verbis ipsius facultatis in qua student. Si iurisperitus erit, dicere potest: "Iure cavetur quod ille qui assumitur ad docendum debet esse peritia iuris instructus." Si physicus est, dici debet: "Qui rerum naturas et mortalium complexiones ignorant, non sunt ad physicale magisterium admittendi, quoniam qui causas ignorant magistrari non debent, qui curare non possunt, licet fortuna illos quandoque respiciat per directum. Sed carissimus filius meus et dilectissimus socius vester magister .B., qui hodie mihi debet succedere in ordine magistrali, doctus est in theorica et in practica eruditus: unde precor ut ipsum debeatis audire, et propensius honorare." Item quilibet magister artem in qua studuit debet sollemnioribus laudum preconiis in suis exordiis commendare. 

***
© Steven M. Wight, Los Angeles 1998
Scrineum © Università di Pavia 1999